龔嘉欣母親被爆是非揭母女關係疏離 ：幾乎20年無聯絡

龔嘉欣與張振朗於TVB劇集《靈氣逼人》上演一場人鬼戀，龔嘉欣飾演嘅女鬼雲柳芳一角除咗成日失驚無神彈出彈入，情緒激動時更會發生電流事故，而且劇內造型多多，包括大戲、懷舊及現代造型，令劇迷大感新鮮，收視不俗。早前有指《靈氣逼人》係龔嘉欣離巢之作，但佢接受訪問時就澄清自己唔係離開TVB，下個月仲會開新劇。然而，有傳媒於昨日（18日）報導龔嘉欣母親再婚並育有一子，又指爆料者稱有人在內地有廠有車有樓，但就有濫用香港社會福利之嫌，揚言會向學生資助處事務處作出舉報。

就報導傳聞，龔嘉欣就回應指自小父母離異，自己係由爺爺嫲嫲湊大，好少與父母接觸，幾乎20年無同母親聯絡，更表示只係知道對方生活幸福快樂，所以唔會打擾佢，其他嘢好多都唔清楚。其實，龔嘉欣過往亦曾接受媒體訪問時坦承父母於深圳經營塑膠用品生意，自細與雙親關係疏離，由於喺單親家庭長大，以前會好想有人依賴好恨結婚，但而家嘅諗法已經完全相反。今年年頭有傳，龔嘉欣與日籍甜品大師松岡哲疑似秘密拍拖兩年，但日前為劇集《靈戲逼人》造勢時談到感情事，龔嘉欣就笑言仍在尋覓當中，最理想可以拍劇、做生意及談戀愛三線發展。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！