1日5餐博增磅 Anson Lo呻食極唔肥 放暗箭寸姜濤？

男團MIRROR成員Anson Lo早前偕「神隱」2個月後再現身的姜濤同場，突然頭暈入院而成焦點。談及姜濤似乎受「減極都肥」困擾，他卻反「呻」天生瘦底，為1日5餐食極唔肥而煩惱，此番言論即惹來兩大「人氣王」不和的揣測。

MIRROR成員Anson Lo新歌《MONEY》MV收看次數至昨日已破250萬，他接受訪問作宣傳，對於上周五在組合「齊腳」的活動不適暈倒，被網民批評有搶姜濤風頭之嫌，回復精神爽利的他說：「大家諗得太多。」又重申當日因早起身、趕化妝而沒飲水及食早餐才導致身體不適，問到可擔心惹來姜濤誤會？他相信隊友明白事理：「佢有問候我、擔心，即刻Message問我咩事，第2日都有見。好彩唔係好大問題，大家就鬆一口氣。」

他承諾日後會注重身體，對於被指27歲就「財多身子弱」，之前夥拍鄭欣宜開騷時又胃痛，他覺得與公司的工作安排無關：「工作量還好，視乎咩工作範疇，每日12個鐘以上。」他又將責任攬上身，指一切是自己的飲食習慣所致：「平時冇興趣食唔健康或煎炸嘢，醫生就提議我食多啲鹹嘢、重味啲嘅嘢，都有飲媽咪滋補湯，但有時壓力大都會身體唔好。」

露股要睇劇情需要

他表示新歌有多個造型，其中露額頭是新嘗試，問到可接受在戲中露股？他表示：「睇吓劇情需要啦，同埋公司畀唔畀。（有冇練定？）一直都有練全身肌肉。」又呻天生瘦底：「依家130幾磅，要逼自己食多嘢，食少於3餐都會瘦，如果要保持140幾磅，要食5餐同飲奶粉先可以。瘦底嘅人練大隻好辛苦。」問到可有和「肥底」的姜濤分享飲食心得？他自言非營養師，但知道對方狂打籃球及跑步減肥。

問到可會效法姜濤做業主？他笑言要供養父母及愛犬，所以變得很窮，不過分享理想家居是租住式住戶。對於曾批評他「強姦張國榮作品」的DJ梁文禮被電台停職3個月，他自言身為後輩未有資格評論，並表示早已習慣被評頭品足，所以不會受負評困擾。