15歲顧嘉洹亞洲滑板大賽奪冠 非滾總會員奧運夢碎落淚 所屬滑板會：5科A但入唔到大學︱Yahoo

【Yahoo新聞報道】年僅15歲、曾奪「亞洲X-Game大賽」總冠軍的滑板小將顧嘉洹，被指沒有加入港協暨奧委會轄下滾軸運動及滑板總會（下稱滾總），而未獲資格代表香港出戰巴黎奧運。顧嘉洹現時仍在南京集訓，其所屬的中國香港滑板聯合總會會長（下稱聯會）徐彥龍接受《Yahoo新聞》專訪時指，顧數年前曾加入滾總，但成為會員後等了一年仍未獲選拔成運動員，更遑論出賽，心灰意冷下才退出滾總，近日得知失落港隊資格後落淚。徐彥龍形容處境猶如「考咗5科A但同你講唔所有大學都唔收你咁」，又批評滾總「無王管」，埋沒具潛質的滑板選手。

《Yahoo新聞》已向滾總查詢，正待回覆；港協暨奧委會回覆《Yahoo新聞》查詢時稱，知悉並關注事件，正與中國香港滾軸運動及滑板總會跟進。該會企業管治部門已完成撰寫「機構管治手冊」，九月將公布詳情。

入滾總一年 「一場比賽都未出過」

徐彥龍接受《Yahoo新聞》訪問時稱，顧嘉洹早在2021年已加入滾總，成為一年制會員，但一直未有機會參與選拔成運動員，「一場比賽都未出過，佢爸爸尋求好多方法想出賽」，曾透過面談查詢、電郵來往等向滾總查詢選拔事宜，但會方只稱：「選拔你留意住個網啦，到時就會公佈」。顧父幾乎每周查看網站，一年過去亦無選拔的消息。徐稱 ：「求助無門，（顧嘉洹）一年之後就好灰心，離開咗總會」。後來徐經朋友介紹認識顧嘉洹，顧於2022年轉加入中國香港滑板聯合總會（聯會），才有機會參與不同賽事。

選拔機制「unknown」

根據滾總網站的資料，滾總的會籍分為屬會及「通訊會員」，前者分為註冊屬會及觀察屬會，名單上的屬會絕大多數以滾軸運動為主，而顧所屬的聯會則非滾總屬會。網站指通訊會員則可以個人身份申請，可參加滾總的訓練班、級別考試、集訓隊選拔以及各類表演比賽。惟徐彥龍指出，滾總有關滑板選手的選拔制度並不透明，連他本人也無從得知詳情。

滾總網站的《最新消息》一欄有「2024-2025滑板集訓隊 – 選拔資料及報名表」，但點擊後未見選拔資料及報名表供下載。網站亦於7月19日更新「集訓隊守則」，守則中稱「所有香港代表隊成員，均由集訓隊隊員挑選出來，挑選準則除要求達到參賽標準外還要審核該隊員在集訓期間的紀律表現及出席率而定，故此隊員應經常保持最佳狀態及良好行為表現」。徐形容，聯絡滾總的電郵「多到數唔到」，但對如何選拔運動員「都係unknown」，滾總亦無公開選拔細節如比賽所需名次、選手所得分數等，「我哋而家講緊係成個制度嘅問題，已經好難入到總會，入到又要再選，究竟公開選定內部選定會員選呢？係咪勁嘅人你唔係會員就無得選？」

「總會唔認你，呢一世都無得玩」

徐彥龍慨嘆：「總會（滾總）唔認你係運動員，你呢一世都無得玩」，故顧嘉洹早在兩年前已得知未必能代表香港出戰巴黎奧運，「因為參加奧運係需要打積分賽，如果呢啲都去唔到，就所有奧運、全運、亞運都係（去唔到）」。徐感到相當可惜，形容以顧嘉洹的表現，「出年全運會如果落場，頭三應該都無問題」。不過顧嘉洹一直努力練習出戰其他賽事，「佢每日放學就練四至六個鐘，練完先做功課，星期六日就練更長時間」。去年九月顧嘉洹成位首位奪得「亞洲X-Game大賽」總冠軍的港人，「仲有好多金牌，九成都係國家體育局認可嘅賽事、錦標賽」，「佢唔係突然間咁犀利，而係佢本身已經好有potential」。

「佢做到嘅花式動作暫時未有香港人做到」

徐彥龍口中的「potential」是指顧嘉洹的技術含量相當高，「佢做到嘅花式動作暫時未有香港人做到，喺『碗池』賽佢可以跳起整體540度旋轉，同時塊滑板係360度旋轉再落地，呢個係我哋喺奧運先見到嘅動作」。對比香港其他滑板運動員，「我連360度整體都未見過」。顧嘉洹曾在過去「X-Game」比賽中，獲曾任奧運裁判的國際裁判給予80多分的高分數（滿分為100），「同一班裁判喺杭州亞運，香港代表最低係攞兩分，最高都只係20幾分」。

北京隊曾羅致「外借隊員」

顧的潛質亦受到內地關注。由於內地有不少滑板標準場地，顧嘉洹常到內地練習，「訓練期間參加好多市內賽贏咗」，北京隊亦希望羅致顧嘉洹入隊作為「外借隊員」，「連市隊、省隊，首都嘅隊都話要借呢個運動員，你諗吓佢有幾叻」。另一邊廂他卻無法成為港隊代表，「好多裁判都話你好叻，但香港唔認你做仔」，徐彥龍嘆謂「我哋咁大個人都一殼眼淚」，況且顧嘉洹年紀尚輕，「都真係好失望，小朋友只係會喊……對佢嘅打擊都唔知點講」。對於滾總是否知悉顧嘉洹的成績，徐說：「之前大賽贏咗，都有新聞報過，國內都有幾十個新聞報，如果喺香港，打開個電話都會睇到……總會可能唔睇新聞，又無留意體育嘅報道」。

徐彥龍強調，作為體育協會，應盡力給予運動員出賽機會，「為一個項目發展好，其實個會要追住啲賽事」，而非設立多重關卡隔絕有潛質的運動員，「而家唔係你有幾叻、唔係你有無錢，而係係唔係總會運動員，你勁到曉飛都無用」。他指港協暨奧委會轄下有數十個體育總會，「俗啲講句就係各自為政，每個會又有佢哋嘅rules」，直言港協暨奧委會「都無乜辦法」，「政府就不停畀資助（總會），咁佢呢十年有無出過貨？有無攞過獎？」

「因為會嘅問題，啲勁人被埋沒咗」

滑板項目於去屆、今屆及下一屆連續三屆成為奧運新晉項目，運動員亦有年輕化趨勢。徐彥龍指出，「三屆之後就係奧運嘅永久項目」，相信市民對此項目的關注度、運動的普及度亦有所上升。港隊於去年亞運亦有派員出戰滑板項目，但徐彥龍慨嘆：「我哋港隊總會派出賽係年紀最大，但分數最低」，與此同時年輕小將卻未獲出賽資格，「佢哋係睇唔到吖，定係點？人哋又唔係無求助，我哋都有問過總會（顧嘉洹可如何參賽），但最終係沒有獲得回覆」。他曾向國際奧委會認可的滑板及滾軸國際總會World Stake求助，對方也對顧嘉洹不能以港隊身份出戰存疑，並向徐彥龍提供滾總主席的電郵以供聯絡，同樣未獲回覆。

徐續指，奧運每四年才一屆，「過多兩屆體能又會唔同」，加上去屆東京奧運，年僅13歲的日本滑板選手西矢椛亦獲奧運女子街式滑板金牌，故認為總會亦應加強培訓及選拔年輕運動員，「我相信政府畀咁多錢出嚟，都係想畀運動員培訓同增光」，他引述文體旅局長楊潤雄稱今年港隊出賽選手數目比往屆少，「其實我哋好想講畀佢聽，唔係香港無勁人，而係因為會嘅問題，啲勁人被埋沒咗」。