24%女性記得每晚發咩夢 甩牙只是排第二？

有無試過女朋友/老婆半夜三更無啦啦打醒你，因為你喺佢個夢入面你出軌？又有無試過無啦啦嚇到醒咗，因為發夢突然從高處墮下？發呢啲夢其實好常見，不過有無諗過原來發邊種夢，男女都有分別呢？

美國公司Amerisleep搵咗2, 007個美國男女進行研究，睇吓佢哋發開咩夢。不論男女，最常見嘅夢就係無啦啦墮下、同唔應該啪啪啪嘅人發生性關係。而其他較常見就有被人追趕（51%）、重回學校（38%）同咩都無準備就要應付重要嘅嘢好似考試或者開會咁。癡線，咁似我啲夢，真係有次發夢咩都未ready就被迫喺幾百人面前present，嚇到我飆哂冷汗。

而男同女發咩夢都有唔同，女仔相比吓比男仔發較多惡夢。女仔比男仔發得多嘅夢包括被人追趕（54.2%）、甩牙（31. 9%）、另一半偷食（24%）、見到蜘蛛同蛇等生物（20.5% ）。但男仔發得比女仔多嘅夢多數係開心嘢，例如可以自由咁飛嚟飛去（35.9%）、有豔遇（16.2%）同變成有錢人（18.5%）。

發惡夢已經夠慘，記性好嘅話就更sad。有24% 女仔記得哂每晚發嘅夢咁濟，但得14%男仔會記得。而43% 受訪者都話啲夢好真實，51% 覺得其實啲夢代表咗佢哋最心底嘅恐懼同不安。

講真，如果有得揀人人都想發個好夢，但點解連發夢都男女不平等，女仔多發惡夢之餘仲要記得⋯⋯不過正所謂日有所思，夜有所夢，其實係咪平時胡思亂想得多先搞到咁？Take it easy，放鬆啲，何必諗太多～