5個旅行秘技 － 你知唔知機票愈格價愈貴？

成日都話科技的進步，令生活更方便，旅行更加輕易得多。唔識路？用Google Map；溝通唔到？用翻譯app；唔識搭日本地鐵？手機app「乘換NAVITIME」幫到手，訂機票酒店、機位餐飲、租Wi-Fi蛋等，乜都電腦搞曬，今次就等小編教大家5個旅行秘技，一於玩盡佢，學野喇！

1. 點用Google地圖先唔洗用咁多數據？

好多人揀用電話卡買數據，貪佢夠平，鴨記幾廿蚊都有交易，但就未必咁穩定同會限速，對於自由行必備的Google地圖，用量咁大絕對有影響。不過Google地圖其實有個隱藏功能，就係離線狀態，只要你係出發前下載定你目的地附近的地圖，就唔驚出到去用咁多數據喇，呢個功能連Google翻譯都用得嫁，連小編都話正！

2. 熄咗Cookie助你搵到更平的機票

有無發現每次當係搵機票個陣，個瀏覽器都好似好知你心水，彈啲最低價最平資訊比你咁呢？如果情況係咁，你就中伏喇，因為航空公司同搜尋網會用你電腦的cookie記錄機票價格，當你愈搵得多，價錢就會愈高，所以搵機票之前記得熄咗個Cookie佢喇！又或者可以刪除瀏覽器歷史記錄，再唔係就使用唔同的電腦訂機票，都可以令你搵到更平的機票。

3. 點揀飛機位係最好？

外國網站SeatGuru上面就有曬唔同機種的座位地圖，仲有唔同人坐過咩位的評論，另外佢仲有個顏色編碼系統，教你好簡單咁揀咩係靚位同衰位，綠色就係“好位”，紅色就梗係“衰位“，黃色就係一啲有故事的位，以後唔洗再唔知點揀位喇！

4. 訂個Special Meal

訂機票的時候，一般都會問吓你有無咩特殊飲食需要，例如素食，雖然就唔係百分百，但多數訂咗Special Meal的客人都可以係派餐的時候，第一批有得食，咁就唔洗望到頸都長都無得食喇！

5. 用Whatsapp Call、Facetime等免費通話軟件

去旅行仲邊有人會用長途電話嫁，又要開通，又有可能收成千上萬的電話費都無人知。而家科技發達，酒店通常有免費Wi-Fi，識用一定係用Whatsapp call、Facetime、Facebook Messenger呢啲免費的通訊軟件喇，方便又易用，只要確保你係用緊Wi-Fi就無問題！

相片來源：aaviation@tumblr