51歲吳奇隆凍齡不再 面部浮腫條頸去咗邊？

娛樂圈美魔女當道，五六十歲仲keep得好嘅女星數埋唔少，男星更加係比比皆是。今年51歲嘅台灣藝人吳奇隆都係其中一位「凍齡」藝人，外表睇落同廿幾年前冇太大分別。不過最近「柿隆」出席內地綜藝節目《超有趣滑雪大會》，就俾觀眾發現有走樣情況。

《超》由幾位年青藝人主持，其中一集嘉賓有Angelababy同吳奇隆。拍埋班後生，吳奇隆當堂睇落似大叔，更有網民發現「柿隆」面容浮腫之餘，仲好似頸同下巴連成一線，接近出現雙下巴嘅狀況，不禁高呼「男神崩壞」！

睇返節目片段，吳奇隆的確比之前圓潤咗，但係某啲角度依然見得返個下巴。反而個雙眼皮就「雙」得好明顯。

不過吳奇隆喺節目中同其他年青人一齊玩snowboard絕對唔輸蝕，佢謙稱十幾年冇滑過雪。遊戲要求參加者用滑雪板滑到指定位置再「片」起雪花入量杯，最重為之勝出，吳奇隆嘅表現就十分優異。

「柿隆」2009年同前妻馬雅舒離婚，2012年同細自己17年嘅劉詩詩拍《步步驚心》時撻著，2015年結婚，2019年兒子出世。舊年有傳媒影到一家三口外出行超市，場面溫馨；吳奇隆受訪時亦有提過盡量抽時間送個仔返學，果然係好爸爸。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！