58歲鄭浩南拍片感慨香港變化大 惹內地網民不滿：你說話注意分寸

現年58歲嘅演員鄭浩南，憑電影《古惑仔》反派形象深入民心，近年更到內地發展搵真銀。而佢亦有進駐抖音，不時上載影片與網民互動一番，不過最近佢上載一段自己喺香港生活嘅影片，結果引起內地網民批評。

上月尾，鄭浩南喺抖音上載一段搭遊艇出海玩嘅影片，首先佢一路行一路話：「每次返嚟我都咁開心，因為呢個係我出世嘅地方－香港。」之後影片就跳到去佢玩完水爬上船，期間佢好感概咁話：「時間過得好快，眨下眼幾十年，喺80、90年代出到海，呢個範圍、成個香港……邊度有咁多朋友、咁多船。香港變得好緊要，好與壞，大家自己衡量，但只有一樣嘢，我冇變過！」

雖然有唔少網民將焦點放喺佢身材上，大讚佢keep得好好，例如「這個年紀，有這樣的身材，真的很自律。」、「身材很好」及「身材是真的好」等等。不過亦有網民不滿佢講「好與壞，大家自己衡量」，留言：「好一個好定壞；自己衡量」、「什麼叫 好與壞自己衡量 你說話注意分寸 別給自己找麻煩」，不過亦有網民斥該網民「玻璃心」、敏感又自卑。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！