7位準備/已進入娛樂圈的星二代

呢排港男已經吸引唔少星二代參加，近日連「馬神」馬德鐘個仔都話有興趣加入娛樂圈。其實都唔出奇，星二代通常都遺傳咗爹哋媽咪嘅優良基因，天生有優勢食娛樂圈呢行飯，以下8個就係想入或者已經入咗娛樂圈嘅星二代：

星二代男神

1. 190cm精通3國語言：馬在驤（Xiang）－馬德鐘兒子

「馬神」馬德鐘高大威猛，仲做過G4，睇個樣已經型爆，唔怪得拍親劇通常都做男主角啦。而近日佢個仔馬在驤首次單獨出席公開活動，身高1米9，高大靚仔，仲有肌肉添，睇嚟有操開。馬在驤現時18歲，精通中英法文，仲話自己未拍過拖，仲唔引死一班姐姐流哂口水～馬在驤話自己有興趣入娛樂圈，試過跟阿爸上橫店睇佢拍戲，最想就係學阿爸做警察角色或者拍動作片，睇嚟我哋好快可以喺螢幕上見到呢位小鮮肉啦～

2. 美國名校生：黃愷傑（Wesley）－趙雅芝、黃錦燊兒子

61歲趙雅芝近日參加內地真人秀《我們來了》，容貌依舊未變，被稱為優雅凍齡女神。其實趙雅芝後生時已經迷倒不少男性，佢三個仔都遺傳咗優良基因，其中兒子黃愷傑更加入咗娛樂圈。身高178cm嘅黃愷傑外型討好，美國南加州大學畢業，其後讀埋北京電影學院表演系碩士課程，完成學業後正式加入娛樂圈。不過現年29歲嘅佢主要喺內地發展，拍過幾套電影，最近仲參加咗體育競爭綜藝節目《陽光藝體能》，喺節目中Show腹肌為佢增添咗唔少人氣呢～

3. 港男大熱：楊灌澤（Christian）－程可為姪仔

程可為作為TVB資深綠葉演員，後生嗰陣原來係美女。雖然今次係佢個姪仔楊灌澤想入娛樂圈，不過同一個家族應該都會遺傳到好基因嘅。今年19歲身高179cm嘅楊灌澤，早前就參加TVB《2016香港先生選舉》，為進入娛樂圈鋪路。其實Christian之前喺多倫多參加《型男家族》時已經贏咗亞軍，亦參加過國際標準舞賽事，拎過唔少獎架，唔單止有樣仲多才多藝呀。雖然Christian仲未完成學業，所以就算當選，會唔會放棄學業入娛樂圈仲係未知之數，但佢就表明自己好想表演同演出，睇嚟入行嘅機會都幾大。

星二代女神

4.主持拍劇兩棲：黃芷晴（Adrian）－黃日華女兒

爸爸黃日華身為「無綫五虎將」之一，做過《天龍八部》嘅虛竹同喬峰、《射鵰英雄傳》嘅郭靖、蕭十一郎等大俠角色，當然有返咁上下顏值先得啦，媽媽梁潔華以前都係演員，嗰個年代個個都天然美女，所以佢哋個女黃芷晴都幾靚女架。而Adrian都揀咗同爸爸媽媽一樣做演員呢條路，之前曾經跟住爸爸成為香港電視網絡（HKTV）嘅藝員，拍過《開腦儆探》、《我阿媽係黑玫瑰》等劇，又主持過節目。去年仲被香港知名監製鄧特希欽點喺劇集《只有情永在》擔正做女主，宜家Adrian得26歲，相信有大把機會啦。

5. 大台重用：湯洛雯（Roxanne）－湯鎮宗女兒、湯鎮業姪女

爸爸湯鎮宗做藝員，叔叔湯鎮業又係藝員，湯鎮業當年仲係「無綫五虎將」之一，當年仲因為做《天龍八部》段譽，其英俊不凡嘅公子形象迷死唔少少女，所以有咁優良嘅家族基因，湯洛雯唔意外地一樣係一個靚女。湯洛雯參選2012年香港小姐而入行，雖然6強止步，但之後拍劇集《愛·回家》李思思一角深得高登仔歡迎，後來再做埋《學是學非》主持，知名度更加上升。早前喺劇集《完美叛侶》已經有唔少戲分，嚟緊都仲有唔少劇集搵咗佢拍添。

6. 演藝世家：姜麗文（Lesley）－ 秦沛女兒、姜大衛同爾冬陞姪女

爸爸係香港影視界資深演員秦沛、叔叔係香港著名演員姜大衛同導演爾冬陞，三兄弟後生都係型英帥靚正，兩個叔叔已經係影視界一線小生，成日做型到爆嘅武俠英雄，三兄弟夾埋拎過無數獎項。所以呢，姜麗文亦係靚女一名，起初同哥哥姜文杰組成Benji and Lesley歌手組合出道，後尾仲去埋HKTV拍咗幾套劇添。人又靚，唱歌又好聽，宜家仲拍埋戲，前途無可限量啦～

7. 影帝真傳：梁静禧（Chloe）－梁家輝女兒

作為絕世好男人、好丈夫、好爸爸嘅影帝梁家輝，後生嗰陣已經係靚仔一名，隨住年紀增長，更加散發成熟男人魅力，而佢老婆江嘉年其實年輕嗰時都係靚女嚟。所以佢一對孿生女都得到遺傳非常靚女，兩姊妹不時喺IG大曬靚相添。而細女Chloe已經大學畢業，早前接受訪問嘅時候，亦都表示有意留喺香港發展，想試吓拍電影或者廣告，但都會問咗屋企人意見先，希望有機會喺銀幕上見到Chloe嘅演出啦～

圖片來源：馬德鐘太太＠微博、黃愷傑＠微博、內地綜藝節目《陽光藝體能》＠微博，《型•男家族》比賽官方網頁、黃芷晴＠Facebook、湯洛雯@Facebook、湯洛雯@Instagram、姜麗文@Facebook、姜麗文@Instagram、梁静禧@Instagram