90年代艷星 離開娛圈做過麥記 鄭艷麗再入ICU

九十年代拍過多部三級片嘅女星鄭艷麗，前日喺facebook上載住院照片，仲要手背插針，原來佢再次因身體狀況被送入深切治療部。好在鄭艷麗後來再出post報平安，情況已經好轉，可以離開ICU，而且「鉀指數升得好快，冇咩其他疾病、應該好快出院」。前年6月鄭艷麗因厭食症導致體內鉀水平過低入院，一度入住ICU，仲因為病情反覆要進出醫院。

鄭艷麗1988年參加TVB《銀河接力大賽》女主角組勝出而入行，本應係力捧小花，仲拍過梁朝偉主演嘅劇集《俠客行》，但只係喺電視台逗留3年就轉戰影圈，冇耐三級片盛行，外表清秀嘅鄭艷麗亦都加入性感女星行列。有傳鄭艷麗接拍其中一套電影時，只應承露兩點，但被導演強迫之下變成露三點，雖然套戲票房過千萬，鄭艷麗喺公開場合向導演潑酒洩憤。

拍過多套三級片之後，鄭艷麗認識台灣富商黃任中。黃出名鍾意結交女星，已故女星陳寶蓮亦同黃任中扯上關係。鄭艷麗其後成為黃任中契女，仲帶埋媽咪過台灣打工，為黃府做廚師。鄭艷麗契媽邵音音曾經提到，鄭艷麗多年來只係收過黃任中送嘅鑽石錶，但都俾人借走一去不返，黃對鄭嘅照顧，更多係教佢做人道理。後來黃任中患病，身邊美女四散，鄭艷麗留守到黃離世為止，堪稱有情有義。

幕前演出機會不多，鄭艷麗偶而靠登台搵食，後來索性由跑馬地搬回屋邨居住，仲去快餐店打工，點知被周刊影到成為封面人物。邵音音話，眼見契女生活清寒，多次想出錢幫忙都被婉拒，反而契女過年過節仲會送禮兼問候，實在難得。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！