AK騷前反口唔「封咪」 Ian表演公開換衫

早前宣稱要擱置音樂計劃的Anson Kong，昨日在音樂會記者會上否認「封咪」，解釋只是想專注拍劇而押後推出獨唱歌；至於拍劇拍到病的隊友Ian則無意效法，堅持拍劇與做歌同時進行！

MIRROR成員Anson Kong（AK）與Ian，昨日聯同歌手陳蕾現身《拉闊音樂會》記者會，宣布5月14日合體開騷，吸引逾500名Fans撐場，聲勢浩大！問到今次有甚麼新嘗試？Ian笑言想試試不唱歌，只表演棟篤企，但Fans大叫不收貨，他即改口表示可在台上表演換衫。他們又即場為對方的歌曲設計舞台，AK的畫功明顯最不濟，Ian收到他的大作即扁嘴，怎料AK揚言要在他的家中見到這幅畫，Ian斷然拒絕：「冇可能。」場面搞笑！

受訪時講到首度在舞台合作，3人均大表興奮，問陳蕾會否挑戰跳舞？她即問AK：「可唔可以教我跳《虎道門》？我嘅第一次會唔會畀咗你哋？」早前AK在Fans群組嗌「封咪」，不再推出個人歌曲，他揚言只是誤會：「我同Ian拍緊劇集《冰上花火》，因為檔期排得太密，本來計劃錄新歌都錄唔到，希望完咗個劇再重新投入音樂事業，想喺拉闊前有第一首歌。」

忙到病都Enjoy

而Ian之前病倒仍要為劇集開工，他笑說：「工作人員知我病咗好開心，佢哋話Ian終於有得休息真係好，都休息咗幾日。（會唔會同公司反映，唔好將工作排得太密？）好矛盾，因為我好鍾意工作，好享受密密麻麻嘅檔期，拍劇時都有繼續做歌，如果一日有40個鐘就開心。」AK接口：「我就係計唔掂條數，所以拍好劇先做歌。」問Ian會否學好兄弟「封咪」？他說：「我會同時間一齊做，我唔封咪。」AK即反擊：「我封咪，係為咗走更長嘅路！」