C AllStar送別經理人小吉及監製阿簡 發文感恩回憶12年合作點滴： 那日見

C AllStar早於舊年音樂會透露有幕後團隊嘅重心即將離開香港，梁釗峰仲一度係台上爆喊；噚日（6日），合作12年嘅經理人小吉及監製阿簡啟程移民，梁釗峰、陳健安（On仔）及何建曦（Jase）到機場送機，並分別喺社交平台記錄感受。

C AllStar歌曲《留下來的人》探討散與聚，三位成員都分別用上歌曲一句「那日見」及「只可接受新生活的蛻變」表達感受。小吉與阿簡見證住C AllStar由2009年成軍、2017年休團單飛、2021年重組三個階段，梁釗峰發文回憶咁多年嚟與小吉與阿簡並肩作戰嘅經歷：「2009年，遇上，無數個重要時刻，我們都同在。鬧過交，比佢哋煩過，一齊開心過，興奮過，亦有感動過，啲眼淚呢…邊數得清。迷失嘅時候，慶幸咁多年背後有兩位支柱，而家雖然條柱就遠咗啲，我哋各自好好為新生活加油吧！祝福, All the best Love u all, my C family」

而On仔就上載送機合照，形容阿簡和小吉係多年來最大嘅舒適圈，寫道：「簡，多謝你嘅栽培，多謝你成就C AllStar嘅一切，亦製造我23歲至今最青春最黃金嘅回憶，多謝你嘅任性。小吉，永遠記得你最強嘅一句『俾啲好嘢人睇！』12年嚟辛苦哂，多謝你。」又指，每次跳出comfort zone，可以更認識自己與世界，同時令自己變得更強，祝願大家新生活安好及順利。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！