Canon 全新多合一打印機 ﹑ 彩色雷射打印機及多媒體投影機系列發佈

今日 Canon 發佈左一系列全新既多合一相片打印機 ﹑ 彩色雷射打印機同埋多媒體投影機，除左有學生哥入門之選同家用必備之外，當然就唔少得針對專業用家以至中小企用户既需求所推出既新產品啦！

Canon PIXMA MG7770 ，售價為 $1888

Canon 多合一相片打印機

首先講既就係 Canon PIXMA MG 系列，整個系列均為多合一相片打印機，價錢由 $698 到 $1888 不等，豐儉由人。而今次新 PIXMA MG 系列「最吸引眼球」既就當然係最高階既 MG7770 ，因為佢不單規格較強悍，而且仲有四種顏色黑﹑白﹑紅同金揀返，而金色更係四個型號中 MG7770 中獨有，夠晒土豪！ MG7770 比其他型號既分別就在於佢可以透過 NFC 連按一拍即印，就算無任何網絡，亦都可以將流動裝置打開 Canon Print Inkjet/SELPHY app ，然後揀返適當既文件或相片，拍一拍 NFC 位置就開無線打印或者掃描，夠方便呢，而且黑白同彩色打印速度更可高達 15 和 10 ！如果唔想開 NFC ，都可以用 WiFi Direct 無線網絡直接從流動裝置打印 PDF 檔同相，唔需要駁電腦。 MG7770 售價為 $1888 ，現已在港公開發售。

MG6870，無左 NFC 一拍即印同碟面打印， LCD MON 亦由 3.5″ 變做 3″ ，售價為 $1288

MG5770 ，打印速度再度減慢同 LCD 則變成 2.5″ ，同埋唔支援插卡即印，售價為 $888

MG3670 ，為系列中最低階型號，不支援 NFC 和 WiFi Direct ，只可存取點模式，速度也是最慢，不過也是當中最便宜的型號，非常適合學生哥初入門，售價為 $688

Canon 多媒體投影機

除左多合一打印機，當然亦唔少得 Projector 啦！今次推出既兩部新機： LV-WX300USTi 同埋 XEED WUX500 ，兩部針對用户群不同，價錢以至規格亦非常不一。

Canon XEED WUX500

WUX500 配備全高清 1920 x 1200 解像度，而今次新型號比過去更慳電，用既 AISYS 5.0 不但能令投影燈既光源流失減少，畫面就會更亮；而且加強左節能成效同降低二氧化碳排效，能源使用量僅每流明 0.073W，待機狀態僅 0.2W，可以話係非常低耗既機種。而且更重要係加入內置 WiFi 功能以及全新既 HDBaseT 發送器，用 WiFi 就唔需要再連住好多線路，投影工序就簡單好多，只需要將流動裝置或者電腦同 WUX500 用同一個 Rounter 既 WiFi 就可以連接；至於 HDBaseT 發送器，就岩晒遠距離投射既用户例如學校課室老師避免阻擋到投射畫面，因為佢可以用 1 條 LAN 線連接就有 100 米遠既距離同非常穩定，比過往多條線獨立接收視頻同音頻等不同訊號多條線又唔穩定來得好。WX500 既售價為 $35800 ，並且提供 2 年本地上門保修服務。

Canon LV-WX300USTi

至於 WX300 ，則只配備 1280 x 800 既 WXGA 解像度，但佢勝在機身小巧輕便，而且有超短距投射，只需距離投影幕 28.2cm 就可以有 80 吋對角投射，而投射距離 44.6cm 更可投射大至 100 吋，夠晒用户方便係細小空間投射出大尺寸影像。而且配備一個非球面鏡，用以提供梯形矯正功能，同埋投影幕顏色修正功能。再者，佢內置互動攝像鏡頭，老師可以同學生一齊互動，當投影幕係白板用；又或者可另購手指觸控模組用手指直接 3D 書寫。 WX300 售價為 $12800 ，同樣提供 2 年上門保養。

Canon 彩色雷射打印機

至於今次推出既全新彩色雷射打印機 ImageCLASS MF729Cx 同埋 MF628Cw ，其實就係專為中小企而設既。首先 ImageCLASS MF729Cx 就具備密碼保密打印同部門識別碼功能，咁就可以更妥善保護機密文件同埋管理使用量：每次要啟動機密文件都需要輸入正確密碼先可以打印；而且同 MF628Cw 一樣可內置 300 個使用者户口，可以設定每個用户權限同監控個別使用者既使用量同可用功能，咁就唔怕有啲同事用太多 printing 。

而且仲可以透過網絡功能，用户可將掃描文件同傳真即時 send 到 email ﹑ 網路共享資料夾或者 USB 記憶體，比各部門既職員用。而且兩款打印機都支援全新既網絡傳真功能，透過網絡傳送同接收傳真，就算係海外地區亦無需繳付長途電話費。而且兩部機都可直接用 USB 記憶體直接打印唔洗用電腦，印野就更加方便。

而兩機最主要既分別就係 MF729Cx 比 MF628Cw 打印速度更快，每分鐘可打印 20 頁，而 MF628Cw 僅有 14 頁； MF729Cx 打印記憶體有 1GB ，而 MF628Cw 則只有 512MB ；而且 MF628Cw 既 USB 記憶體直接打印不支援 PDF 檔。 MF729Cx 售價為 $5988 ， MF628Cw 售價為 $3988 。

ImageCLASS MF729Cx

ImageCLASS MF729Cx

MF628Cw

MF628Cw

MF628Cw

• 不想錯過新科技 ? 請 Follow unwire.hk FB 專頁 http://facebook.com/unwirehk/

The post Canon 全新多合一打印機 ﹑ 彩色雷射打印機及多媒體投影機系列發佈 appeared first on UNWIRE.HK 流動科技生活.