女友曾搶人男友稱好快「玩厭」 Frankie終開腔證清白

【on.cc東網專訊】人氣組合MIRROR成員Frankie嘅圈外女友Christy忽然自證阿嫂身份後，網上一連串其私生活混亂嘅爆料令全港震驚，平時自拍嘅尺度之大亦令網友爭食花生。估唔到事件仍然未完，網上繼續有人爆出佢嘅密友Story post，言論依舊睇到眼凸。

今次Christy嘅截圖係自認做小三，仲公開同該男士合照，發文表示覺得「正印女友」好慘，言論驚人：「其實我真係志在有個人陪下我周圍去，我都覺得做佢條女真係好X陰公，佢哋仲要就嚟五周年，繼續若無其事咁慶祝扮恩愛。我玩厭之後一定會爆比佢條女知，再咁畀人呃落去真係好慘，即管睇吓邊個識玩啦。」

大部分網民仲等緊嚟緊會有大把圖繼續放出，個個等住「食花生」，亦有粉絲心痛Frankie，擔心佢遇上愛情騙子，不過亦有網友為Christy發聲，指大家唔應該對佢指指點點，始終都係佢哋兩個拍拖，只有佢兩個先清楚對方心意。

面對眾多網友攻擊女友，潛水兩日嘅Frankie終於開腔，於社交網發長文，力證女友非小三：「最近一啲有關我私人生活嘅報道，為皮寶寶同支持我嘅你哋帶嚟困擾，我好抱歉。同時都想澄清，我係喺上一段感情結束後，先正式開始依家呢一段關係，希望大家唔好再作猜測。」佢又真情剖白自己依家嘅自信、開朗終於畀粉絲見到：「以前嘅我，唔了解自己好睇嘅地方，喺舞台放鬆唔到，冇信心。我開心大家最近睇到我嘅轉變，睇到我自信咗，開朗積極咗，打開咗自己，畀到更多好睇嘅自己大家睇。我知道呢啲注意絕對得來不易，我嘅轉變我感受到，我知道大家都感受到。」最後佢向粉絲承諾會繼續做好自己：「感謝你哋嘅體諒同支持。我會繼續進步，繼續做好，成為一個更好嘅自己，去報答所有皮寶寶同支持我嘅你哋。再次感謝大家。」

【更多影劇新聞詳情請上東網新聞】