J Lou Asha掛住做宣傳 張敬軒請錯嘉賓 攞架嚟丟

「早餐界KOL」張敬軒近年玩社交網絡玩到出神入化，可是對着兩位靚女網紅J Lou及Asha卻顯得一籌莫展，被兩女無視之餘，玩溜冰時又雞手鴨腳，認真冇面！

歌手張敬軒主理的一連五集網上綜藝節目《軒公敲碗》接近尾聲，上集成為網上短片平台熱門影片第一位，上架6天突破100萬點擊，氣勢強勁。而第4集請來美女網紅J Lou（林欣）及演員Asha（徐㴓喬）擔任嘉賓，節目上架一晚，又再次打入熱門影片排行榜。愛玩社交網的軒仔被稱為「早餐界KOL」，難得請來兩位網紅，他乘機討教：「節目結束時，係咪全部都要話記得讚好自己個channel？」J Lou即說：「依家冇咁興啦，依家啲人反而唔想叫你撳個like。」軒仔聽後即尷尬笑言：「我最近都仲叫啲人like我個channel。」正是「同行如敵國」，之後兩女更笑言：「subscribe我哋兩個嘅channel就OK㗎喇，唔使理佢（軒仔）㗎！」軒仔即一臉無奈謂：「請嘉賓喎，哼！」

J Lou運動會奪金

今集3人落場玩溜冰，之前軒仔還得戚說：「自己踩冰可以轉到圈，報過花式溜冰，可以好瀟灑咁一邊扣鈕一邊溜冰。」可是其後突然「笠水」，不敢自吹自擂。到正式拍攝，3人雖未至於一仆一碌，卻見雞手鴨腳，接着開始「三人冰上運動會」，比賽項目包括「估歌仔」、「大電視」及「冬季奧運會」遊戲，最後J Lou奪金，軒仔獲銀牌。

《俏郎君》入8強

另外，「叱咤樂壇我最喜愛的歌曲」第二輪投票經過48小時後，截至昨日最新8強走勢是軒仔的《俏郎君》、MIRROR的《BOSS》、姜濤的《Dear My Friend,》、陳卓賢的《DWBF》、呂爵安的《E先生連環不幸事件》、盧瀚霆的《Megahit》、C AllStar的《留下來的人》及張天賦的《記憶棉》，至於柳應廷的《狂人日記》及MC $oho & KidNey feat. Kayan9896的《係咁先啦》被foul！