Jer柳應廷@MIRROR前女友Kelly 攬新仔睇show po咀嘴相放閃
今日MIRROR成員Jer(柳應廷),被爆同MIRROR隊友Jeremy(李駿傑)及ERROR隊長肥仔(梁業)夾份投資嘅高級日本餐廳,開業半年就宣布結業仲傳出「拖數」,有傳三子呢次各自輸過百萬。無獨有偶,今日有傳媒搵到阿Jer嘅前女友Kelly早前喺IG放閃,懷疑有新戀情!
Kelly喺限時動態貼出同半裸長髮型男咀嘴相,並寫上Stay Crazy with your partner,默認對方係新伴侶。從背景可見,Kelly同疑似新男友拍照地點,應該係上個周末中環海濱舉行嘅S20潑水音樂節。Kelly上個月都post過一個長髮型男背面照,唔知係咪同一位。
阿Jer 2018年參加《全民造星》時,已經同外界稱為「文青系女友」嘅Kelly拍緊拖,仲試過一齊拍去旅行嘅youtube片。入行後阿Jer同Kelly仍然交往,會時不時post拍拖照,Kelly亦試過喺MIRROR演唱會舉燈牌支持男友。
不過前年年尾,Jer同Kelly被發現互相取消IG關注,仲delete晒往日二人合照。當時有傳阿Jer為《全民造星4》擔任導師時暗撻參賽者Alice(許寶恆),點知被Kelly發現。後來阿Jer向傳媒否認同Alice嘅緋聞,但承認同Kelly出咗問題,會諗辦法氹返對方,殊不知冇晒下文,相信都係分手收場。
各行各路之後,阿Jer專注於事業,上個月舉行首次個人音樂會,但感情上就亦未再有新發展,甚至早排出新歌《JM單身9》自認冇著落。而Kelly就由文青系變成型格系金髮女,IG多數都係post下旅行單人相。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!