MakerVille記招｜藝人出席晒冷造勢 MIRROR官方歌迷會5月成立

ViuTV上周公布重大人事變動，總經理魯庭暉離任，出任為電訊盈科媒體集團旗下新公司MakerVille行政總裁，及繼續擔任ViuTV董事會成員，而ViuTV總經理一職就由廣告界資深從業員鍾廣德出任。MakerVille於今日下午三時首次舉行記者會宣佈未來大計，並有MIRROR、ERROR、PIX3L、COLLAR、強尼及練美娟等歌手藝人出席，陣容非常鼎盛。魯庭暉喺IG限時動態上載記者會現場照片及寫上「REHEARSAL到聽日3點開騷」及喺IG發文寫上：「在這裡，凝聚每一顆匠心，專注說好故事；令舞台發亮；讓星閃耀。燃起一點一滴一團的熱情，雕琢一格一秒一幕的細節，集結成一刻驚艷一段里程一起的美好經歷。我們用心，要作品成為經典；更用心，要每顆匠心備受尊重。在這裡，我們連結一起，一起令願景成真。」，唔少網民都紛紛留言支持及送上祝福。

記者會喺約三時舉行，播放完精彩節目及劇集短片重溫後，司儀強尼便介紹MakerVille CEO魯庭暉出場，魯生指MakerVille主力於內容創作、藝人管理及活動管理，並話：「咁點先叫做到呢？第一，要做更多唔同類型、新嘅嘗試、更好嘅作品畀香港嘅觀眾，畀ViuTV嘅觀眾。第二，要做到喺香港以外嘅人，可以透過唔同嘅方式睇到我哋嘅作品。第三，要做到更多嘅合作，無論係台前幕後，香港以至全世界，要同更多唔同嘅製作單位，唔同嘅平台一齊合作，一齊令到大眾感動。我哋MakerVille會好努力咁去做，我哋會make it happen。」

記者會仲播放嚟緊嘅作品預告片，例如劇集《季前賽》、《i.SWIM》、將於2023年初上映嘅動畫連續劇《屎撈人》、真人騷《戀愛Staycation》、《尾二一屆口罩小姐》及《我哋係COLLAR》等等。之後，記者會播放《命案》預告片，並邀請杜琪峰（杜Sir）、鄭保瑞、游乃海及朱淑儀上台與谷德昭傾計，期間除咗圍繞《命案》嘅故事及演員陣容等之外，谷德昭仲問杜Sir熟唔熟悉MIRROR，杜Sir就話：「又嚟？好似多咗啲啦，成日都提佢哋，多唔多得滯呀？MIRROR嗰啲已經通街都係，我都真係避唔到，閃嗰度又見，真係幾討厭㗎！」

MakerVille除咗製作之外，仲有藝人管理。之後，藝人許寶恆（Alice）、葛綽瑤（Yoyo）、何洛瑤（Sica）、鍾卓穎（Ash）、楊安妮（Win Win）、黃奕晨（Dixon）、王頌茵（Kathy仔）、鄭伊琪（浩南）、陳子豐、李敏（Ranya）、米露迪、曾贊學（阿神）、蔡寶欣（Pony）、張右雨（右雨）、鄧家禮（Vincent）、虞逸峯（Dennis）、蔡宛珊（Sarika）、李昭南（Mishy）、陳安立（Brian）、李炘頤（Alina）、練美娟、駱振偉（Thor）、岑樂怡（阿妹）、陳嘉倩、強尼、陳俞希（Hailey）及沈殷怡（Shirley）分批出場介紹自己。

有藝人又點少得歌手呢？先有ERROR唱出《愛情值日生》，之後輪到PIX3L唱《Just Lean On Me》及COLLAR唱出《Call My Name!》，最後當然唔少得有MIRROR壓軸表演新歌《Innerspace》，掀起高潮，獲全場歡呼拍掌。另外，記者會上更公佈MIRROR喺5月正式成立官方歌迷會，仲指歌迷加入歌迷會可獲得會員專屬嘅迎新禮盒、訂購演唱會、粉絲見面會及會員專屬商品嘅機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！