MIRROR年度排名︳第10位︰Tiger邱傲然 潛力股幾時爆升?

·2 分鐘文章
邱傲然(Tiger)
邱傲然(Tiger)

今年作品

主持︰囝囝囡囡730、克服他她它、幫緊你應援團

劇集︰太平紋身店

MIRROR大發令唔少人振奮,因為睇到香港娛樂圈嘅可能性。另一角度睇,亦睇到香港娛樂圈嘅局限。

正如Tiger呢類一上台跳舞就識發光嘅藝人,可以點捧?

當然不能抹煞佢做主持拍劇嘅努力同進步,但係睇返《造星》嘅片段,甚至《宵夜燒到過埋夜》教跳拉丁舞嘅部份,都睇見舞蹈先係Tiger強項。但係香港歷來有幾多個單靠跳舞而成名嘅藝人?仲未計香港舞蹈界嘅出色舞者呢?

成功突圍嘅隊友都要唱埋歌,Tiger參賽嗰陣都有自彈自唱,仲幾charm添,只係音準爭啲。

最大問題可能係冇即刻行前一步嘅決心,但《調教你MIRROR》已經提供答案︰Tiger認為MIRROR先係根基,打好基本功先再發展其他可能;佢又覺得可以先俾其他11位哥哥上先,自己仲細仲可以等。不過《調教》所見Tiger都想有單飛機會,佢希望用3年時間準備。

成個PACKAGE計,跳舞得,唱歌要執,外表造型越來越有睇頭(長髮好睇但唔好SET到女仔去GRAD DIN咁得唔得?),演技可以,基本條件有齊,仲身處當時得令嘅男團,似足美國科技股,而家業績未必靚,業務亦未必有人識,但係一旦大爆發真係不得了。

既然香港都係未有方法單靠跳舞而走紅,咁我都想睇到Tiger將拉丁舞融入跳唱嘅個人表演,至少香港冇人咁做過,甚至洗走拉丁舞被曲解成「騎呢」同「誇張」嘅負面標籤。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能