MIRROR ERROR成員合資串燒店執笠 曾被網友鬧趕客 仲誤傳5串串燒收$588

MIRROR同ERROR人氣一時無兩，兩隊成員紛紛搞生意，但係早前MIRROR成員Jer（柳應廷），被爆同MIRROR隊友Jeremy（李駿傑）及ERROR隊長肥仔（梁業）夾份投資嘅高級日本餐廳，開業半年就宣布結業仲傳出「拖數」，有傳三子呢次各自輸過百萬。而近日Jer、肥仔同MIRROR另一成員AK（江𤒹生）合資嘅日式串燒居酒屋「影之鳥」，亦都宣布結業！

呢間位於尖沙咀嘅居酒屋2021年底開業，當時賣點除咗係MIRROR同ERROR成員做老闆，餐廳有唔少fans應援物之外，仲主打有日本師傅助陣。

睇返食評網嘅評論，大部份都係評價正面，但亦有2篇負評。其中一篇嘅食客認為用餐時間得一個半鐘頭太短，6點入座，6點15分點完菜，7點已經被提示last order，而且侍應態度麻麻。另外有人話餐廳5串串燒收$588好唔抵食，但睇返餐牌原來價錢係一人套餐收費，$588仲可以點其他菜式。

早前股東之一、AK嘅哥哥Ambrose出過post表示AK已經退股，而一度積極巡鋪嘅AK都早已唔出現，加上有傳餐廳嘅fans應援物近月已經撤走，相信串燒店執笠並非「突然死亡」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！