Ray Online｜陳家珮指中環展城館位置優越 倡作林鄭前特首辦

中環嘅前任行政長官辦公室(前特首辦)，最多只可以畀3位前特首使用，隨住林鄭月娥卸任，政府唯有幫佢租用金鐘太古廣場辦公室，去年度開支大約917萬，引起社會質疑。新民黨立法會議員陳家珮建議利用中環展城館作為前特首辦，可以善用政府物業，仲可以慳返租用商業大廈嘅租金。

陳家珮前排帶1對仔女參觀展城館舉辦嘅《家國情微型藝術展》，佢大讚展覽展示咗好多精緻嘅微型藝術品，每個作品都巧妙咁捕捉家國情懷，展現藝術家對文化同歷史嘅深刻理解。

可善用政府物業

除咗行展覽，陳家珮去到地理位置優越嘅展城館，而有感而發。佢留意到展城館進行緊優化，考慮到呢啲空間嘅潛力，佢建議政府考慮利用空間作為前特首辦。陳家珮覺得前特首辦喺展城館落戶，唔單止可以善用政府物業，仲可以同文化藝術緊密結合，提升辦公室嘅使用價值，促進社會同文化嘅交流。

原文刊登於 AM730 https://www.am730.com.hk/本地/ray-online-陳家珮指中環展城館位置優越-倡作林鄭前特首辦/494994?utm_source=yahoorss&utm_medium=referral