The Do Show︳吳君如呻TVB人工低決定離巢 爆加薪只加50蚊

吳君如同MC張天賦主演嘅電影《我談的那場戀愛》上映在即，女主角吳君如接受Do姐鄭裕玲youtube節目The Do Show訪問，二人大談由電視台工作至影圈發展經歷。

鄭裕玲同吳君如都係TVB出身再轉戰影壇，吳君如原來只係喺大台拍過5套劇，後來加入《歡樂今宵》，然後就已經離巢拍戲。被問到當年點解離開電視台，君如直指因為人工太少，Do姐立即話「呢個人好識計算，其實君如係非常聰明」。但君如就話自己係誤打誤撞入影圈，因為得知人工只係加50蚊！吳君如續指，喺電視台嘅生活難以預計，要等監製揀選，雖然電影圈運作方式相似，但片酬唔會太差。

Do姐問君如離開電視台驚唔驚，君如話當時有知名度，所以唔驚，而且本身已經有戲拍緊。同時君如提到電視台制度就係提高藝員知名度，藝員自己再接外面job搵真銀。君如再講返離巢原因，話得知加薪幅度後有質疑自己。「死啦，我真係值咁少錢呀？公司挽留我，我5百蚊個show，你加我50蚊？」。

兩位影后只係合作過幾套戲，但交情匪淺。訪問中吳君如大爆當年拍《武俠七公主》時曾經同Do姐匿喺車度瞓覺傾心事，又試過拍《表姐，你好嘢！4之情不自禁》時一齊做果酸換膚搞到皮膚紅腫， 一齊俾導演鬧冇演員道德。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！