TVB公益金慈善show 唱《一事無成》幫失業人士「打氣」？

上周末TVB舉行籌款節目《萬眾同心公益金》，少不免會有歌手表演呼籲大家共襄善舉。不過有FACEBOOK專頁「廣東歌關注組」就發現，大會揀歌方面好似出咗少少問題。

話說其中一節係先介紹公益金幫助受疫情影響市民而設嘅基金，而出鏡嘅申請人李太就因為丈夫失業家庭有財政壓力，呢個基金就幫到佢，跟住就先有周柏豪出來唱歌《讓愛高飛》，後來再搵鄭融合唱二人經典歌《一事無成》。廣東歌關注組就話明白呢首合唱歌經典深入民心，但無奈呢part環節講明係想為失業人士家庭打氣，但偏偏就送來一首《一事無成》，咁出嚟意思就真係……

廣東歌關注組又分享另一個個案，原來黎明曾經分享過，佢好多年前去探訪智障小朋友，大會本來安排佢唱一首當時hit歌，但Leon當時認為喺呢個場合唱呢首歌，可能會惹來誤會或者反效果，結果就婉拒咗大會嘅提議。而呢首歌就係《傻癡癡》。

呢個話題瞬即引起討論，另一個流行歌facebook專頁「講音樂」亦搵到另一個慈善show揀錯歌事件，就係2008年星光熠熠耀保良，安排吳雨霏唱《分手要狠》，聽落冇問題，但係歌詞入面有句「別扶助病困」，就顯得有啲「倒米」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！