TVB收視︳口碑影響《陀槍師姐2021》第二周收視跌 《燕雲台》近結局稍微反彈

今次公布嘅係TVB 2月1至7日嘅收視成績。前一周開播嘅《陀槍師姐2021》驚喜地錄得23.4點收視，但係唔少觀眾睇完頭幾集都話劇情「膠膠地」，而且同前4輯冇咩關連，究竟第二周收視能唔能夠維持呢？

果然第2周嘅《陀槍師姐2021》收視，比頭5集跌1點至22.4點，雖然比起前一檔嘅《堅離地愛堅離地》好，但係呢個跌勢好可能係稍後集數持續，要視乎觀眾有冇興趣睇陳豪同宣萱談情嘞。

另一套黃金時段劇集《燕雲台》步入尾聲，2月首周收視再微升至22.8點，周一至五表現比《陀槍師姐2021》更好，星期六嗰集甚至比前一周升1.6個收視點。下一周公布嘅結局篇收視成績，話唔定會有驚喜。

食飯時間2大皇牌《東張西望》同《愛回家之開心速遞》，前者全周保持23點左右水平，後者周一至五微升至27.2點，周六播出嘅1141集比前一周反彈近2點。

下星期TVB將會公布過年前及初一至三嘅收視資料，今年受疫情影響觀眾冇得外遊，會唔會令收視一反常態不跌反升，將會係下周收視報告重點。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！