TVB記者陳尚萱唔知直播開始驚呼「吓？到我呀」打風採訪吹到花容失色出晒街

TVB女記者向來有唔少網民留意，去年加入TVB做實習記者嘅陳尚萱Celine Chan，今年大學畢業「轉正」成為全職記者，更因為英文流利而獲安排同時為明珠台採訪。陳尚萱早前中秋節負責直播講述維園情況，到佢為明珠台報導時，當主播Timothy Li交代由陳尚萱報導時，畫面影住陳尚萱望住手機，未有為意直播已經開始。現場工作人員於是提醒陳尚萱「喂！講啦！講啦！」，Celine 先至如夢初醒，仲用廣東話爆咗句「咩呀…吓？到我呀？」，連主播Timothy Li都用廣東話提場「Celine講。Celine講。開始呀」，令到明珠台嘅英語新聞罕有出現用廣東話。不過陳尚萱好快就「轉channel」以英文作報導。

陳尚萱之前都出現過「直播事故」。月初颱風「摩羯」襲港，Celine被安排到紅磡碼頭採訪，不過直播時橫風橫雨，吹到佢披頭散髮兼面容扭曲，最慘係成個過程出晒街，仲要被網民cap圖！

出鏡時不時展露燦爛笑容嘅陳尚萱，被網民封佢做「四萬萱」。原來Celine自細已經成績優異，中學就讀拔萃女書院，畢業後升讀港大新聞學系。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！