TVB掟千萬俾郭子豪何廣沛方紹聰搞遊戲節目《真係唔好笑》 點知真係唔好笑冇得出街

近年TVB嘗試製作新類型節目吸納年青觀眾，早前就搵咗幾位寂寂無名嘅藝員主持《七線人棄王》玩爆料。最近有傳郭子豪、何廣沛同方紹聰三位男藝人，因為搞咗個Youtube Channel而被TVB認為有得做，甚至視佢地為網上人氣channel「試當真」TVB版，因此落重本由三子主導遊戲節目《真係唔好笑》。

有報導指，《真係唔好笑》每集耗資近一百萬，而且出動大量幕後，淨係攝影師都十幾個，目標係想做到韓綜Running Man嘅效果。據知早前已經拍好第一集，但係有消息話TVB總經理曾志偉睇完之後，認為節目名符其實「真係唔好笑」，結果未有期出街。

主腦之一方紹聰回應時話冇聽過咁講，但亦唔知節目幾時播。又有傳拍攝當日何廣沛十足製作人指揮大局，但因為安排有問題，嘉賓之一麥美恩要嗌咪要求先拍遊戲部份，但何廣沛似乎唔buy。

郭子豪、何廣沛同方紹聰組成嘅YOUTUBE頻道已經開張半年，上載嘅片都有近50條，不過反應普通，最多人睇嘅都係2萬view數左右，訂閱人數都係得5千幾，比起佢地學習對象「試當真」嘅42萬訂閱量，爭好遠！

到底呢個節目係咪為咗挑戰ViuTV拍咗兩季嘅《膠戰》，起碼都要出咗街先知。但係《真係唔好笑》被負評「真係唔好笑」，呢下又真係幾好笑。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！