TVB為奧運造勢搞明星運動會 有人提議推舉呢10位藝人出賽

《2020東京奧運會》因疫情關係延期至今年7月23日揭幕，無綫已蓄勢待發，日前仲出動半百藝員召開記者會宣佈屆時5條頻道將會喺兩個半星期播出500小時東京奥運賽事，仲以「TVB與你全情奧運」作今屆奧運口號。雖然未知《2020東京奧運會》仲會唔會因疫情再度順延，但副總經理曾志偉就表示仍然會有一系列宣傳造勢，仲話到：「做就大件事，唔做更大件事。」

曾志偉仲喺台上講到宜家正籌備緊明星運動會並喺奧運揭幕前舉行，呼籲全台藝員、歌手以及社會人士參加，藉此炒熱奧運氣氛。其實早喺2004年雅典奧運，TVB已經舉辦過一次明星運動會《Number 1紅星運動會》，「奧運六星」其中5位小生：黎諾懿、馬國明、陳鍵鋒、吳卓羲、黃宗澤都有份落場。不過，原本有份跑4x100接力賽嘅吳卓羲就喺上場前疑因中暑暈倒退賽，由陳鍵鋒頂上；唔止佢哋，就連鍾嘉欣、楊卓娜都有份參與，楊卓娜原來仲喺運動健將，分別喺短跑同跳高項目都攞到冠軍，真係令人睇漏眼。唔知今年嘅明星運動會，又有邊位藝員參與呢？而近日有傳媒就提議以下藝人可以參加某啲項目，你又點睇？

【第1位】曾志偉：裁判
身為副總經理嘅曾志偉當然要參加，「Super～」同埋「今次打和啦～」呢兩句無人不曉，由佢做裁判的話，大家一定都會好開心。

【第2位】當奴：全馬馬拉松當奴可以話係全馬馬拉松嘅常客， 2019年參加途中跑至30公里時抽筋，但仍以3小時56分成績跑完，佢仲話係呢一世最好嘅成績，雖然佢表示跑完對腳就斷咁濟，但相信只要多練習，佢一定可以再次完成全馬賽事。

【第3位】湯怡：全馬馬拉松
湯怡練得一身驕人馬甲線就係人都知，但仲非常鍾意跑步，曾連續7年參加渣打馬拉松比賽，2019年首次出戰全馬就已經以4小時15分鐘10秒成績跑完42公里，係眾多女藝人之冠，所以就最適合喺TVB明星運動會出戰全馬馬拉松；不過，7月正正係湯怡嘅預產期，可能未必成事了。

【第4位】蔡思貝：半馬馬拉松
蔡思貝早喺2014年首次參加渣馬，就用咗約49分鐘完成10公里賽事；而2018年以1小時47分55秒就跑完半馬，成績好過好多人。

【第5位】余德丞：游泳
余德丞細細個就學游水，入行前仲曾經係香港游泳代表隊，得過唔少獎項，喺TVB明星運動會出戰游泳項目一定無難度；不過佢喺2018年踢足球期間曾經昏迷，唔知身體狀況仲及唔及當年？

【第6位】何雁詩：高爾夫球
何雁詩自6歲開始接觸高爾夫球，未入行做歌手前仲曾經係香港高爾夫球代表，2010年代表港隊出戰廣州亞運，分別拎到女子個人和女子團體第26名同第8名，舊年再度「出山」參加「香港業餘高爾夫球女子賽」贏得冠軍，實力超水準。

【第7位】關禮傑：跳遠
關禮傑喺劇集《叛逃》由一幢樓天台跳到另一幢樓天台一幕就畀網民瘋傳並取笑，網民不但發現關禮傑根本無足夠動力跳遠，又指喺網上地圖搵到疑似劇集中天台位置，發現兩幢樓距離達9.88米，仲話如果佢真係跳到，就破晒8.95米跳遠世界紀錄。其實陳展鵬都可以參加跳遠，因為佢喺《叛逃》都有挑戰呢個跳天台嘅極限。

【第8位】謝天華：攀石
提到攀石，不得不提謝天華。事關佢喺劇集《神鎗狙擊》以一場單手攀石傾電話戲份引起熱話，仲畀網民話佢違反攀石三點不動一點動嘅常理，形容為「至膠」一幕；不過，謝天華就被指佢力大無窮，勁過宇宙最強，TVB明星運動會點可以唔預佢？如果要搵個人同佢比賽嘅話，相信只有陳山聰可以挑佢機，因為山聰喺《純熟意外》中，可以單手攬住個女仔，然後一手捉住牆邊，唔使跌落街。

【第9位】李克勤：送禮禮儀大使
李克勤係英國足球隊曼聯死忠粉絲，2005年曼聯到港進行友誼賽，佢就以大使身份向曼聯送上一塊由自己CD封面照砌成並加上「Welcome to Hong Kong」字樣嘅板框，仲話相信對方收到會放喺英國曼聯嘅博物館；不過，翌日卻被發現紀念品棄置咗係更衣室，就係因為呢件事，李克勤就畀人叫做「送禮勤」，所以如果要搵禮儀大使，李克勤必定勝任。

【第10位】石修：大會急救
石修喺劇集《隔世追兇》嘅催眠術神乎其技，一句「你流緊血，你睇下地下，一滴、兩滴、三滴」就成功催眠對方，被稱為「石修催眠術」，網民讚佢係催眠大師，如果TVB運動會有人受傷，石修必定可以為佢哋急救脫離痛楚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！