ViuTV《造美人》芷橋集集爆喊 Semi黑面被網民瘋狂劣評

ViuTV另類選美節目《造美人》進行得如火如荼，12強名單喺日前已經出爐，入圍包括芷橋（劉芷橋）、Kathy（張育玲）、AB（劉兆汶）、Miko（歐陽玉婷）、OK姐（胡靄琪）、Ann（陳芊妤）、Shweta（林珊妮）、Semi（黎韋彤）、Tracy（周卓盈）、Ice（嚴楚翹）、Stella（楊芷羚）及Jonie（曾祖妮），佢哋分別被編入由Shirley（沈殷怡）帶領嘅「公主組」及由娟姐（練美娟）帶領嘅「平民組」。之後，佢哋就獲安排接受為期3​個月嘅科研美容、化妝、健身及飲食調校等課程。嚟緊節目就會進行淘汰，將減至10人。

睇咗幾集之後，當然有佳麗得人歡心，有佳麗被網民瘋狂劣評啦！講到最深受大家喜愛嘅就係同專家Dickson撞樣嘅OK姐，雖然佢嘅外貌唔係最標青嗰個，不過佢嘅真性情及進步空間就令佢得到網民支持，仲留言為佢打氣。

相反，被網民瘋狂劣評嘅就有2位，分別係芷橋和Semi。如果大家有集集追嘅話，相信都好記得佢集集都喊，例如未能即時晉身12強、 體內年齡係12人中最老等等，結果令一眾網民睇到都覺得佢好煩，有時都唔知佢喊啲咩，所以更有網民希望佢快啲俾人淘汰出局。至於Semi被網民dislike嘅原因就係佢黑面，話說佳麗們被安排上化妝課程，期間OK姐被安排幫Semi化半妝，可能OK姐嘅化妝技巧麻麻地嘅關係，Semi全程黑面，仲話OK姐隻手震到好似患柏金遜症 ，最後更要求化妝學校校長幫佢化妝。網民睇完呢集之後都紛紛留言鬧爆佢，話佢乞人憎兼封佢做「黑面Semi」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！