XiX解散分兩邊發展 劉芷君單飛 其餘5人以女團出道透露新作最快6月面世

TVB《聲夢傳奇2》彈出嘅XiX由梁善知（Crystal）、繆昀希（Charlotte）、鄧曉殷（Kiele）、楊秉頤（Caitlin）、莊殷玥（Vici）和劉芷君（Aster）組成，於比賽時備受評審和導師讚賞，有傳佢哋獲厚待，而且係內定冠軍。六女當時否認被內定，強調比賽公平，最終奪得「優秀表現獎」和「舞台魅力獎」，但僅獲第四名。XiX得獎後，好快就獲得登上紅館嘅機會，於陳潔靈帶領下喺《羅文•傳承全城紀念演唱會》獻唱，不過之後嘅工作量都唔多，多數被安排出席TVB節目充撐場面；歌唱方面則僅參與過紀念張國榮《REMEMBERING Leslie》企劃，翻唱《Miss You Much》一曲，但仍未有自己嘅代表作。

XIX嘅女團計劃將有變化，有指TVB將飛起其他成員，只與隊長Aster簽約，坊間又有傳Aster將簽約英皇；其他成員就會交畀Eric Kwok。Aster於社交平台分享公主打扮造型照，被大讚有星味，仲被指係菊梓喬接班人。日前Aster更出席官方歌迷會活動，宣布即將推出第一首個人歌曲；至於唱片公司去向方面，就未有對外透露簽咗邊間公司，不過TVB當日就有派人採訪，而且「一蚊Joe」游莨維和「蔥頭」丘梓謙更到場與Aster分享經驗。

XiX其餘成員又喺早前為環球唱片舉辦嘅紀念張國榮演唱會演出，於後台與Eric Kwok及其太太葉佩雯攬實合照；本身以5人姿態出席TVB母親節特備節目《我和媽咪有個約會》錄影，但成員Charlotte因身體不適缺席。其餘4名成員與Eric Kwok接受訪問時，直認好掛住Aster，但佢哋會繼續努力；又透露好快會正式出道，Eric Kwok補充指XiX會繼續喺樂壇發展，出道作比較輕快開心，預計6、7月推出。被問到係咪擔任XiX經理人，Eric Kwok就否認，指有新消息屆時會再公布。唔知會否與當年力薦曾比特加入環球一樣，向環球推介XiX呢？至於會唔會改團名，XIX就表示唔會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！