全民造星4︱B4 Cosplay日本暴走族驚喜滿分 Sica執生能力強獲花姐狂讚叻女

ViuTV選秀真人騷《全民造星IV》繼續第三回合淘汰賽，噚晚（2日）播出一集由A4組對戰B4組，B4隊長Sica喺表演自選項目時跌落樓梯，好彩佢執生能力強，坐喺地下繼續跳舞，獲得花姐、評判及網民一致高度讚賞。

第三輪小組對決由A4組對B4組，先出場嘅A4成員包括Carmina（羅洛家）、子涓、Ariel（曾家瑩）、Ada仔（姜咏鑫）及安希婷，而Carmina就被列入「死亡名單」，佢哋以跳唱形式表演《Lady繽紛樂》，不過評判們似乎唔太受落，例如吳雨霏話拿捏唔到sexy嘅感覺，及卓韻芝指睇唔出繽紛嘅感覺等等。而B4組就由Sica（何洛瑤）、東東（郭東彩）、Liu哥（廖雪蕎）、暐翹組成，Liu哥則被列入「死亡名單」，佢哋以性感跳唱形式表演《Come on, Bad boy!》，今次係Sica第一次著高踭鞋跳舞，一開場Sica就跌落樓梯，不過好彩佢執生能力強，坐喺地下若無其事繼續跳舞，成功化解危機。佢嘅「神執生」獲得花姐狂讚佢「叻女」，連評判都一致高度讚賞，卓韻芝讚佢好叻及「跌倒起身為你加好多分！」

之後輪到指定項目唱《來自天堂的魔鬼》，兩組嘅表演風格截然不同，A4組表演相對文靜可惜得唔到評判賞識，直指唱得差，而B4組就cosplay日本暴走族，熱愛cosplay嘅Sica為自己及成員做形象指導，造型麻甩味濃到令人意想不到，視覺效果及驚喜程度滿分，更成功蓋過成員普通話弱嘅缺點，評判睇得投入又開心。喺今晚就會知道佢哋嘅表演可唔可以拯救到Liu哥，大家拭目以待！

另外，唔少網民睇完今集之後都對Sica改觀，紛紛留言大讚佢，例如「睇完今集，都幾中意佢 唔知有冇人留意到佢扮happy伯」、「Sica 形象百變，扮乜似乜，交足戲，吾入女團都可以開幾個節目俾佢玩cosplay, 扮嘢比賽，膠戰等節目…… 有時間仲可以跟阿祖做舞台劇。最緊要佢化妝同埋道具可以撈埋，最岩viutv ,慳水慳力」、「佢仲error過error」、「執生能力好強」、「睇完呢集做左fans」、「MVP」、「Sica好正 佢真係有好多既可能性」、「Sica 夠放，正」、「真心想睇sica入膠戰玩 同阿正合作應該好有火花」、「睇左琴晚個集B組兩個表演，對Sica有番d好感，之前佢真係麻麻哋，但之後表現發揮到佢長處，所以我都估佢應該入到10強」及「sica真係估佢唔到，佢既落力淡定真係犀利，仲要識執生」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！