全民造星4｜天籟之音對決 Ash不敵Winka 網民讚樣靚聲線靚望復活

ViuTV《全民造星IV》正在熱播中，繼續99強爭入60強，喺噚晚（16日）最新一集更上演一場天籟之音嘅對決，由26號Winka（陳泳伽）對81號Ash（鍾卓穎），兩位參賽者各有千秋，令三位評判陷入兩難，最後由Winka勝出，而Ash就跌入復活區。

Winka喺2018年已經加入樂壇，喺今年已經先後推出歌曲《Cupid-19》及《無名》 ，實力不容忽視。Winka以《If I Ain’t Got You》作為參賽歌，期間連花姐都認為女團好需要Winka，而Wing亦話本身Winka唔係女團名單上，不過聽完佢唱歌即刻記得佢；而評判們亦聽得非常陶醉。喺聽完佢唱廣東歌之後，導師許廷鏗話：「我會要佢！」，佢嘅演出明顯得到大家喜愛。

而現職係一名新生嬰兒深切治療部護士嘅Ash，同Winka同樣係唱得之人，喺海選後梁祖堯已經大讚佢唱歌好似天使一樣。Ash以《All About That Bass》作為參賽歌，期間花姐同梁祖堯已經表示鍾意佢，仲話佢係箍牙都好靚嘅人。之後評判亦有叫佢唱廣東歌，喺即席演唱後得到評判嘅讚賞。

Winka同Ash表演後，評判直指呢round係最難選擇嘅對決，結果由Winka奪得三盞藍燈勝出，晉級60強並進入梁祖堯隊伍，Ash就跌入復活區，而節目主持強尼亦罕有地表示好希望可以喺比賽入面聽到Ash唱歌。

其實除咗強尼之外，唔少網民都好希望Ash可以復活，紛紛喺網上留言支持佢，例如「心心眼 記得係復活區救番佢」、「唱得好喎，如果佢個樣加把聲入女團，我好想睇囉！」、「由內靚到外 希望可以復活啦!!」、「女團的靈魂人物，好有potential」、「Ash一定要復活啊～我鍾意你多過Winka～雖然兩個都唱得都好好。但你嘅聲音更有soul 無特別炫技～」、「好好，好自然，好靚，聲線靚，女團，救岀來，不要錯過佢！」及「根本可以直接出道!」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！