泳兒玩鬼口水大整蠱 雲浩影Cloud尖叫OMG George@PIX3L：嚇死我！

近日泳兒（Vincy）為跟Nowhere Boys合作推出的新歌《撞到正》落力宣傳。為配合歌曲「人比鬼更可怕」的訊息，早前Vincy於ViuTV音樂頒獎禮《CHILL CLUB推介榜 年度推介23／24》記者會上，便向一眾歌手朋友包括：Gin Lee李幸倪、周國賢（Endy）、陳凱詠（Jace）、Lokman@MIRROR、周殷廷（Yan Ting）、George@PIX3L、雲浩影（Cloud）、Nowhere Boys主音Van及SPIRAL埋手，以血淋淋的假手加鬼口水玩驚嚇整蠱。

男歌手當中，大部份都處便不驚，Endy跟Vincy握手後有點疑惑，再望望原來是假手，並說：「我就係諗點解你隻手長咗咁多。」自己被整後，Endy便拿着假手拍拍站在附近的Jace，雖然假手一直摸着Jace的面，但她毫不察覺，直至摸到假手質感時才問到，「咩事呀？咩嚟㗎？」然後望望便「哇」一聲大叫，「你哋好無聊。」而同門的Gin則連續「嘩」了兩聲，然後才道：「我就係奇怪點解你隻手咁淋嘅。」但她堅稱自己「唔驚」，更謂Vincy任務失敗，Vincy則表示要睇play back，十分搞笑。

至於「最唔襟嚇」則是George及Cloud，Vincy走近George並早有預謀地問：「可唔可以握個手呀？」毫無防範的George一口答應：「可以呀。」誰不知George一握便縮回，隨即邊掩嘴邊叫：「嘩！嘩！嘩！嚇死我呀！嘩！」過了十多秒仍驚魂未定；至於Cloud則最無辜，她是被Nowhere Boys的Van「推介」給Vincy，Vincy再次立即上前握手，看到Vincy手上一堆鬼口水的她好奇地便伸手去摸，更說：「嘩，好多呀。」不過摸了一下後便被鬼口水的質感嚇到「Oh! My God!」高聲尖叫，而Vincy亦充滿成功感，邊笑邊說：「終於有一個人嚇親啦！」

事後Vincy表示為了這個嚇人任務，做了很多準備功夫，「搵咗一啲同公司嘅artist做白老鼠，分別係小巧、Aiden（洪助昇）都比我嚇過，但佢哋都係唔驚。」所以這次她是抱着一個「全軍覆沒」的心態去玩。到達現場後，她覺得只是假手不夠驚嚇，突然靈機一觸，想到將鬼口水加在假手上，「因為我覺得如果佢哋接觸到一啲好黏、好黐立立嘅嘢，反而可能個心會突然間好驚訝，好彩都有幾個artist又俾我嚇親，雖然半成以上都唔係話好驚，哈哈。」其間Vincy不小心將鬼口水掉到地上，「有人行過話我跌咗嘢，我一望，咦！原來係我啲鬼口水，但嗰個moment又唔可以認係我嘅，所以我就扮晒唔關我事，唔係我嘅。」Vincy又謂經過今次整蠱經驗，覺得整蠱人「唔係咁容易」，「好容易穿崩、好多突發嘅狀況，人嚇人原來真係好難。」