鐵拳英雄｜52歲梁琤打得又睇得 飾赤靈王獲讚保養得宜

由TVB劇集《城寨英雄》班底製作嘅《鐵拳英雄》正熱播，劇集以曼谷唐人街為背景並以武打戲為主，而喺劇中飾演反派「赤靈王」趙紅月嘅梁琤亦有唔少功夫動作場面。現年52歲嘅梁琤可以話係保養得宜，完全唔似已經年過半百歲，所以佢飾演嘅赤靈王與姐夫彭堅有姦情甚有說服力，唔少網民仲覺得keep得好好，外貌同身型都冇走樣，驚嘆佢係唔係食咗防腐劑。

最近劇情就講到赤靈王妖言惑眾，唔少街坊都誤信佢嘅詭計。一班街坊更合力將安娜綁喺祭壇上，話燒死呢個不祥人嚟祭天就可以令瘟疫消失。華僑社嘅人出手阻止及勸街坊唔好信赤靈王，連棘（陳山聰飾）手持解藥來現場，成功揭穿赤靈王詭計。赤靈王更與步青雲（陳展鵬飾）打起上嚟，並成功逃脫。之後，佢打算前往殺死趙紅花（韓馬利飾），不過就被神秘人打傷，再被趙紅花殺死。

梁琤於1990年參選亞姐，雖然未能晉身十強，但獲得電影監製賞識而入行，接拍首套電影《黑貓》飾演性感女特工，更成功勇奪《第11屆香港電影金像獎》最佳新人。之後，佢開始建立其武打女星形象，接拍咗唔少動作電影。1997年加入TVB並參演劇集拍攝，例如《烈火雄心》、《金枝欲孽》、《飛虎II》及《鐵拳英雄》等等，而《鐵拳英雄》亦係佢離開TVB嘅告別作，隨後佢選擇北上發展。

梁琤喺《烈火雄心》飾演古天樂女友駱曉翠一角，深得觀眾喜愛，更令佢事業走上巔峰。不過喺呢個時候佢爸爸突然罹患癌症，為咗可以全力照顧爸爸，梁琤選擇大量減產，陪爸爸去醫病同做化療，當時佢不惜花掉近七位數醫療費。可惜佢爸爸於09年病逝。非常重視親情嘅佢，為咗可以令媽媽安心，佢選擇復出，更努力工作養活一家八口，而自己就冇時間拍拖。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！