陳煒再婚︳同前夫離婚後扮夫妻上節目 未婚夫都係失婚人 曾傳撻著護士

今日有報導「煒哥」陳煒拍拖近3年嘅醫生男友陳國強，喺女友生日派對上求婚成功。而陳煒亦喺IG post出晒戒指相，暗示就快做陳太！

再做人妻嘅陳煒走出離婚陰霾搵到幸福，咁啱陳國強都係失婚人，遇到真愛自然更加珍惜。

48歲嘅陳煒曾經係亞視一姐，出道以來緋聞甚少，2008年同台灣商人顏志行結婚後退出幕前。不過呢段婚姻原來只係維持4年，2012年加盟無線，時機同離婚相當吻合。復出後嘅煒哥甚少談及家事，亦少有同顏志行公開現身，離婚傳聞不脛而走。2016年拍《煒哥的味道》時顏志行做嘉賓亮相，陳煒仲稱對方「老公」，但係之後一年，煒哥承認已離婚多時，嗰排亦有傳顏志行同台灣女星鄭雙雙交往。

當時陳煒解釋未有勇氣承認婚變，亦以為有彎轉，後來為免影響對方聲譽而決定宣布離婚，煒哥亦好感謝前夫上節目幫手，證明佢地仲係朋友。不過煒哥喺TVB節目講返離婚呢單嘢，就認為前夫對自己有所虧欠，而且係對方提出離婚在先。

前年7月煒哥公開有新戀情，男友係同黃智賢拍檔做醫美診所嘅醫生陳國強，煒哥正正係因為做診所開幕嘉賓而認識陳國強。雙方做咗朋友一年有多先正式發展，而陳國強亦曾經有過一段婚姻兼有2個女。當時有傳陳國強仲未離婚，但後來澄清一年前已辦妥手續。同時亦有報導話陳醫生同煒哥拍拖前，本身同診所靚女護士行得好埋。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！