兩大前輩級歌手登兩電台歌曲榜冠軍 網民：而家係2024定1984？

而家網民聽歌渠道多口味又個人化，電子傳媒流行榜權威性大不如前，但都反映出各媒體價值觀。根據資料，港台中文歌曲龍虎榜最新一期冠軍係區瑞強嘅《我是DJ》，而新城勁爆本地榜最新一期冠軍就係葉麗儀嘅《感恩》。喺社交平台討論流行音樂嘅帳戶「論盡音樂」就發現呢個有趣現象，並且寫道「我想問而家係2024年定1984年？」，得到4百幾個like。

網民就兩大前輩級歌手雄踞冠軍有唔少討論，有網民認為歌曲好聽的話，歌手年紀同年資唔應該拎嚟討論。亦有網民留意到郭富城同樣派咗新歌Exit上台，假如都係冠軍歌的話就真係懷舊啦。

唱「嘟一嘟樂悠悠」唱到街知巷聞嘅區瑞強，負責新歌《我是DJ》曲詞創作，首歌港台嘅DJ選秀比賽主題曲，登上港台榜冠軍都唔出奇，畢竟各個媒體都不時谷自家節目或活動主題曲上榜。

至於葉麗儀姐姐就剛剛開完演唱會，從海報所見新城係呢個show嘅支持媒體，咁新歌當然要「支持」啦。留意返，《我是DJ》同《感恩》都只係分別喺港台同新城上榜，其餘媒體流行榜未見踪影，可能大家口味真係好唔同啦，百花齊放海納百川嘛。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！