勾起思親之苦 朱晨麗傳授喊功 打救蔣祖曼

蔣祖曼為了演好劇中的喊戲，四出向人求教，拍檔朱晨麗聞言即場教路，分享自己拍喊戲的心得。而備受力捧的無綫小生朱敏瀚，表示要趁機會向多方面挑戰，揚言要踩入樂壇做「咪霸」。

藝人朱晨麗、蔣祖曼、朱敏瀚、龔慈恩、鄭俊弘、韋家雄和鄭子誠等，昨日現身室內攀石場為無綫劇《輕．功》宣傳，眾人分成兩隊比賽攀石，朱敏瀚更幾乎攀到最高點，結果雙方最後打和收場。

劇中有多場喊戲的蔣祖曼，笑言向來眼淚少，因此到處向人求教。身旁的朱晨麗則教她要多喝水，又分享心得：「我會諗自己離鄉別井，好耐冇見過媽咪，諗啲傷心同容易觸發情緒嘅事，例如同家人嘅關係。（同媽媽會唔會好似劇情咁經常嘈交？）媽媽唔喺香港，我都想同佢鬧交，其實鬧交都係愛嘅表現，我都想媽媽喺身邊，開心傷心都可以同佢分享。」

朱敏瀚唱歌搵JW做導師

至於向來熱愛足球的朱敏瀚，表示早前有幸親身觀賞偶像C朗拿度於曼聯的最後一戰：「當時都未知佢離隊，好在有睇到，所以人生有咩想做就要即刻做。」問他現時想做甚麼？他直言想挑戰唱歌：「我想試吓唱電視劇主題曲或者插曲，乜歌都好，兒歌都冇所謂，想有自己嘅歌，JW答應做我導師，我之前有同高層提過，不過未有消息。」他笑言中學時已是「咪霸」，偶像是陳奕迅。