LOONG 9搞簽名會 消費4位數先有得見12子 直接買飛都要呢個價錢

上個月先喺《亞洲超星團》決賽正式出道嘅男團LOONG 9，出道未夠2個月就新聞多多－首先團名被網民恥笑係「龍九」，然後成團一個月內突然宣布加多3名成員，而3人都係來自負責管理LOONG 9嘅內地娛樂公司樂華藝人。至於原本LOONG 9嘅三名香港成員冼靖峰、黃奕斌同文佐匡被指受冷待，LOONG 9進行正式集訓更唔見三位「香港代表」，網民大鬧係「用完即棄」。另外在《亞洲超星團》中表現出色嘅趙天翼最終未能入團，引發fans不滿，有關方面疑似為平息民憤，宣布聘請趙天翼為「LOONG 9兒童藝術教育公益大使」。

搞出咁多是非，LOONG 9終於有全團現身嘅機會。今個星期日有商場舉辦LOONG 9拍手簽名會，係佢地首個公開活動，將會有跳唱表演、同fans交談、簽名同擊掌等環節，各位「龍友」可以近距離接觸成班仔仔啦。而今次活動將會12子全體出動……話晒喺香港舉行，三位「香港代表」當然有得喺主場現身。

要見12位「龍仔」，就要喺主辦商場登記做會員，再消費＄1500就有機會換取活動通行證。此外，內地售票平台亦有安排直接「課金」購買見面會門票，盛惠520蚊人民幣（折合港幣＄580），拍得住喺香港睇場演唱會，但係平過睇許美靜半個鐘音樂會嘅VIP飛囉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！