鄭秀文演唱會︳嘉賓冇TVB歌手？黃宗澤舊愛「玻璃朱」質疑Sammi

鄭秀文You & Mi演唱會進行得如火如荼，而每晚嘉賓名單早前更於網上瘋傳，不過除咗頭4場之外，其餘嘉賓全部錯晒！

觀眾留意Sammi請咩嘉賓以外，黃宗澤舊愛「玻璃朱」朱庭萱都發文，質疑點解Sammi演唱會嘉賓「點解全部都係會上ViuTv嘅歌手」，又指「如果作為前輩提攜新人，佢唔邀請下『星夢』（即現時TVB Music Group)班人？」，並由此揣測Sammi「意向都好明顯下」。

睇返暫時咁多場嘉賓，按場次分別係Serrini、林家謙、張敬軒、陳凱詠Jace、謝雅兒、鄧麗欣、COLLAR同埋周殷廷。自從TVB冇歌手合約制度後，呢班歌手都曾經現身ViuTV，包括兩個台都上過嘅張敬軒。

翻查紀錄，近年TVB旗下歌手擔任個唱嘉賓嘅機會都唔係冇，例如3月底許冠傑演唱會就搵咗炎明熹做嘉賓。而2023年1月，《聲夢傳奇2》嘅黃洛妍就為肥媽紅館演唱會做嘉賓。

「唔請聲夢歌手」呢類質疑都唔係第一次，2022年張敬軒舉行個唱，有冼靖峰(Archie)fans就質疑軒公點解唔請Archie做嘉賓，同樣認為軒公請咗好多新一代歌手上台，而Archie亦公認係張敬軒fans，應該要獲邀。完show後張敬軒寄語冼靖峰「做多啲好作品畀觀眾記住，比起做嘉賓更有意義」。而之後張敬軒為冼靖峰主持嘅TVB音樂節目J Music做嘉賓，算係補返數。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！