《失憶24小時》郭晉安演爛賭渣男 現實婚姻恩愛背後曾經歷低潮

好耐冇拍劇嘅郭晉安，最近終於有新劇出街啦！佢喺《失憶24小時》中飾演吳耀中，佢係一個沉迷賭博兼滿口大話嘅人，仲搞到老婆（譚凱琪飾）同佢分居。現實中郭晉安擁有幸福美滿嘅家庭，佢同老婆歐倩怡喺1999年拍攝旅遊節目認識，當時郭晉安唔算紅，只係住300呎單位, 但憑主唱《櫻桃小丸子》片尾曲《問題天天都多》而爆紅嘅歐倩怡都冇嫌棄過。直到2006年兩人結婚, 之後生咗一對可愛仔女，而郭晉安演藝事業亦越來越順，成功塑造多個經典角色，更憑《戇夫成龍》丶《阿旺新傳》及《忠奸人》三度成為視帝。原來佢哋嘅恩愛背後都曾經歷婚姻低潮，兩人仲差啲搞到離婚。

歐倩怡曾自揭兩度小產，當時兩公婆大受打擊，好彩喺郭晉安同教友支持下恢復過來，更成功誕下囡囡。但之後郭晉安越來越忙, 歐倩怡又淡出幕前，專注家庭同學業，佢考船牌、學打鼓、進修營養學、商業及心理學等等。二人相處時間越來越少，及為一對仔女讀書出現分歧，導致經常嘈交，仲搞到冷戰咗半年。郭晉安接受傳媒訪問時都曾承認有離婚衝動，後來兩公婆商量後決定衝破障礙，挽救婚姻，兩人決定每星期都抽時間過下二人世界，重新建立夫妻感情。之後，佢哋感情更加穩固，又非常珍惜與家人相處時光。上年年尾，佢哋兩公婆仲首次以夫妻檔為《流行經典50年》做嘉賓演唱《萬千寵愛在一身》，真係sweet到爆。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！