《尋人記》勾起回憶成熱話 呢三位「昇女郎」獲關注

無綫節目《尋人記》唔經唔覺已經播咗五集，成功引起唔少迴響，更成為網上熱話。網民除咗大讚節目勾起集體回憶及「金句王」方東昇風趣幽默之外，有份擔任主持嘅三位「昇女郎」黃曉瑩、李曉欣及黃靖婷同樣獲得關注。

黃曉瑩
黃曉瑩（Vinky）於2011年喺無綫做實習記者，2012年中大新聞與傳播系畢業後便正式加入無綫新聞部。喺入職初期，佢曾當駐澳門或戰地記者，之後再轉到港聞組及資訊專題節目做主持。去到2015年佢開始兼任主播，2016年更成為無綫新聞副策劃主任。2018年前無綫新聞台首席主播羅鈺文離職後，黃曉瑩便接替佢嘅工作。除此之外，佢仲開始參與由無綫電視新聞部製作嘅節目，例如《世界零距離》系列丶《長命百二歲》系列及熱播中嘅《尋人記》等等。至於感情方面，佢喺上年年未已經升呢做人妻，低調與男友結婚。

李曉欣
李曉欣（Michelle）喺2012年入讀樹仁大學新聞與傳播系，但後來退學前往澳洲南澳大學繼續升學。2016年末加入無綫，有傳佢當時得罪主播張文采，而被調離主播組。不過好彩嘅係佢之後加入《長命百二歲II》團隊擔任主持。另外，唔少人都覺得李曉欣有啲似女神李佳芯，唔知大家又覺得似唔似呢？

黃靖婷
黃靖婷喺2015年畢業於樹仁大學新聞與傳播系，於2017年加入無綫，由初期嘅無綫財經台專題節目記者，做到主力報道午間新聞。去到上年，佢更加入《這麼遠，那麼近》團隊擔任主持，成為其中一位「昇女郎」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！