前TVB綠葉演員游飈曾拍逾百部劇集被封「御用爛仔」 大談當年辛酸最低3元時薪

前TVB綠葉演員游飈於1989年投考電視製作專業訓練中心舉辦嘅第三期藝員進修班，翌年畢業並加入TVB，從前效力TVB長達21年，期間曾參與拍攝逾一百部劇集，以劇集《大時代》一人分飾三角最為人記得，其餘多為閒角或黑社會角色，因此被封「御用爛仔」。游飈2012年決定離巢TVB轉到香港電視，離巢時月薪僅10,500元，不過因後來香港電視未獲發牌，故專注經營於2004年創立嘅環境工程公司，專門負責去甲醛工作。日前，游飈接受香港演藝人協會專訪，大談當年辛酸。

游飈坦言，當年兩間電視台，一間30元10小時，一間35元10小時，即3元和3.5元1小時，家人並唔贊成佢嘅工作，又指當年喺伊館拍電影畀人搵笨，由朝開到晚，連地鐵都無埋，仲要坐車返元朗都係得40元，不過佢就笑言自己反叛無理家人反對：「我呢啲叛逆青年，始終我覺得係自己做到嘅嘢」。又直言當年有好大滿足感，個感覺係好想參與，拍攝電影和電視時見識到器材好厲害，幕後又好專業。

游飈回憶指，當時做臨時演員學到好多嘢：「放食飯之前，我哋會喺旁邊練跳彈床，經常會自己弄傷自己，但就係好想去強化自己，去做好啲。」佢續分享，曾經有一次拍於石礦場小山攻打光明頂嘅戲，因為太辛苦嘅關係，有好多人因太熱暈倒，由原先150人拍攝變到晏就得返唔夠50人。游飈指自己喺嚴酷環境下長大，笑言：「如果畀佢宜家面對嘅話…（搖頭），你真係，你好難想像嗰個環境點解大家可以，但係我哋當時即使辛苦，但係係享受嘅，因為你見到係認真嘅。」又指，雖然成日被粗口責罵，但當年覺得可以參與到就得：「由臨記到正式演員，頭十年都非常享受。」游飈最後用吳孟達做例子，指如果好似對方咁70歲離世，現年56歲嘅佢其實僅餘下14年：「時間唔係好多，無咩時間畀你去諗」，因此藉宜家勉強行得走得，做到幾多得幾多：「我哋呢啲叫做揼石仔，一粒粒，一點一滴，一步一腳印行出來，我哋嘅底一啲都唔厚，我哋唯有靠自己嘅熱誠、認真，或者產品質素去做，能唔能夠做到成績，大家認唔認同，呢個就我控制唔到，我只能做好自己嘅嘢。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！