絲打圍爐｜唐詩詠爆大合照企位影響心理質素 奪視后後有人爭化妝師

余迪偉日前為網上節目《絲打圍爐》擔任嘉賓，宣傳明年1月舉行嘅一人劇場《Fabulous Me》，與主持人練美娟（娟姐）和唐詩詠（Natalie）大談與同事相處心得。唐詩詠為余迪偉準備咗個破冰心理測驗測性格，唐詩詠嘅測驗結果指佢喺職場係一名聰明和善於應對嘅員工，並且面面俱圓。唐詩詠直言結果都幾似佢：「如果你問我喺好複雜嘅環境中，我嘅態度係你唔好見到我」。

娟姐對唐詩詠嘅諗法覺得好有趣，表示唐詩詠曾喺大公司（TVB）做過，詢問對方：「你真係做到咁面面俱圓咩？但我覺得你係傻妹。」唐詩詠回答指：「係啊，但唔好理我，總之唔好見到我（大合照）。」余迪偉續指，聽過好多影大合照會有人手踭撞人、大合照分晒位同埋有名等講法，唐詩詠則表示冇聽過，不過指排位其實好影響個心理質素：「呢啲故事，真係嘅咩？但我試過唔可以唔企返喺嗰個位。不過個排位係好影響個心理質素狀態，我都係慢慢從配角開始做起，可能第四行，但係下一年就變咗去咗第五行，我就會覺得有咩事，下一年又突然之間去返第六行，又或者去返第三行。」

隨後，余迪偉追問唐詩詠：「咁你係企喺第幾行離開公司（TVB）？」娟姐搶問：「第一行！」唐詩詠微笑點頭承認，坦言：「嗰時唔想牽涉好多複雜嘅是非」，余迪偉詢問：「淨係同啲導演瞓就得？」唐詩詠笑指：「如果可以嘅話，都冇人敢做，但我都冇聽過會有人咁做。」 對於是非，唐詩詠直言自己喺人哋眼中唔係一個好有攻擊性嘅人，不過拿完獎後就會多啲，余迪偉詢問：「多啲奉承？」唐詩詠回應指：「呢個會有，仲有多啲好奇怪嘅事，姐係同你爭下化妝師。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！