《東張西望》主持阮嘉敏 外景訪問智慧擊倒噪音大叔

無綫資訊性節目《東張西望》除咗關注民生及社會問題之外，節目中仲有唔少靚女做主持，成功引起唔少觀眾及網民關注。《東張西望》經常派出靚女主持外出訪問，近期熱門之選就係阮嘉敏（Mandy），好似早前佢著上性感小背心，去咗大埔梧桐寨瀑布採訪。一個去山澗嘅外景拍攝，阮嘉敏就著貼身露腰小背心成功成為亮點。節目出街後，唔少網民都認為佢衣著過於暴露，惹起網上熱烈討論。

過往有唔少市民投訴有「大媽」或表演者喺公園演唱及跳舞造成噪音滋擾問題，佢哋有啲仲會取酬，唔少居民都認為影響日常生活。近日政府就建議修例加強監管。

喺噚晚嗰集，《東張西望》就派出阮嘉敏去到屯門公園，身穿貼身黑色碎花裙嘅Mandy，除咗訪問市民嘅感受之外，佢仲去咗訪問駐紮涼亭及其他公園公眾地方嘅「表演者」。Mandy訪問阿大叔「表演者」除咗表演之外，佢哋係唔係有收錢。之後，呢位大叔就反問佢：「邊個見到我哋有收錢？」Mandy就再追問佢哋有冇收錢同埋係唔係從來冇收錢，大叔就話唔收錢，只係老人家玩下，但係如果有人比錢都好正常。Mandy就再問啱啱話冇收錢，但人哋俾你就照收，大叔就話人哋俾㗎嘛，都會照收。

另外，被問到算唔算係濫用公衆地方賺錢，大叔就好多辯駁咁話，呢個地方係政府俾香港市民娛樂同玩嘅地方，點叫濫用地方。Mandy就話你收錢就唔算係玩，大叔就話啲人自願俾，佢哋冇問過人攞錢。之後，Mandy突破盲腸反問大叔：「點解你唔會選擇唔收嘅？」大叔好似俾佢條問題嚇親，當時完全唔識俾反應。

節目出街後，唔少網民都大讚Mandy嘅表現，紛紛留言：「個主持幾叻女」、「女主持好嘢，比地雷條大陸佬踩」、「阮嘉敏好嘢！👍🏻👍🏻👍🏻」、「主持人好正」、「 女主持好波！」、「欣賞主持！」及「主持做得好好」等等。

去片：https://www.youtube.com/watch?v=nsivefw31kk

27歲嘅阮嘉敏，樣靚身材正，深受唔少網民喜愛。2016年落選香港小姐後加入無綫，之後入讀藝員訓練班。2017年開始拍劇，不過全部都係「路人甲」角色，好似有《踩過界》、《誇時代》、《逆緣》及啱啱被抽起嘅《堅離地愛堅離地》等等。另外，阮嘉敏喺2017年開始擔任《東張西望》外景主持，近排佢經常喺節目見到佢。除咗拍劇同主持《東張西望》之外，佢仲係為唔少綜藝節目演出過，好似係第三輯《美女廚房》，佢就係其中一位美女學徒。