反黑英雄｜學生妹曾文心被嫌太老顏 入行3年為求逼真效果要求真打

TVB熱播劇集《反黑英雄》惹起關注，劇情安排咗三對激具新鮮感嘅CP，包括陳山聰與朱晨麗、張振朗與姚子羚、張頴康與傅嘉莉，非常有睇頭；另外飾演學生妹陳樂怡嘅曾文心（Michelle）亦極吸晴，引起觀眾留意。

曾文心於《反黑英雄》第4集登場，講述徐國賢（張振朗飾）偶遇偷金魚嘅學生妹陳樂怡（曾文心飾），徐國賢見到阿怡母親西敏寺（顏仟汶飾）係道友及被同學欺凌，於是不時照顧對方。隨劇情發展，曾文心嘅戲份亦愈來愈多，昨日（4日）播出一集，陳樂怡因母親欠債而被逼接客向徐國賢求救，徐國賢因而被抓去警署。曾文心嘅演技雖然獲觀眾讚賞，但係有網民狠批佢樣貌普通又太過老顏，唔適合做學生妹角色：「阿媽靚過阿女」、「很老的中學生，到底留班了多少次？」、「為什麼覺得她有漂亮的時候」等等，更有唔少網民都唔知曾文心嘅背景，並對佢有咁多戲份表示不解，直言：「她是哪個高層的女兒啊？」、「20集也是她，到底誰是女主啊，我服了」等等，又有網民指TVB一天到晚只會硬捧一些無觀眾緣嘅人。

其實曾文心曾於中央戲劇學院進修及喺北京國家大劇院演出過，透過第31期藝員訓練班簽約TVB入行。曾文心曾於《萬千星輝賀台慶2023》「給十年後的我」環節中發表感言，指第一套劇就係扮死屍，但記得公公講過無論做咩角色都好，都要好好把握每次嘅機會。曾文心至今入行3年，曾出演《新聞女王》、《羅密歐與祝英台》、《飛常日誌》、《你好，我的大夫》等劇集，今次《反黑英雄》係佢入行以嚟最多戲份嘅角色，覺得好激動及感恩，演繹被同學捉入殘廁虐打嘅場口時為逼真效果，更加主動要求「真打」，跌到膝頭好多瘀傷，仲將個下巴撼到地下。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！