雅虎香港新聞 《舊年暑假搞乜鬼》重拍 導演保證唔會放棄當年仆直嘅續集︳電影LOL
1997年嘅萬聖節檔期，荷里活片《舊年暑假搞乜鬼》成功搶灘，由一班年青演員孭飛，青春愛情驚嚇懸疑炒埋一碟，後生仔梗係buy。結果收到1億2千幾萬美元（下同）票房，差唔多係成本嘅8倍，片商梗係拍續集《舊年暑假仲有鬼》啦。不過因為口碑麻麻，結果票房得返4千萬，係第一集嘅三分之一。第三集嘅《舊年暑假再3有鬼》淪為直接以影碟推出，虎頭蛇尾到呢。
不過因為另一套90年代驚嚇片《奪命狂呼》近年重啟嘅第5集收得，《舊年暑假搞乜鬼》得以復活拍攝「重啟版」，仲會喺下年7月18日暑假檔期喺北美上映。早前有報導指，新版《舊年暑假搞乜鬼》故事，將會跳過票房仆直嘅續集《舊年暑假仲有鬼》。導演Jennifer Kaytin Robinson就出post否認，並且話《舊年暑假仲有鬼》係經典。外媒Collider估計，新版《舊年暑假搞乜鬼》將會好似《奪命狂呼5》咁，延續之前嘅故事而唔係將第一集由頭拍過，並且將1997年版嘅原班人馬主角同新人同場演出，一次過擸晒兩個年齡層觀眾。而家就傳緊電影公司同1997年版嘅主角Jennifer Love Hewitt同Freddie Prinze Jr傾緊強勢回歸參演一角。
《舊》改編自Lois Duncan1972年出版嘅同名小說，講述兩男兩女四個高中生為慶祝開派對，點知飲大咗醉駕撞到人。眾人慌忙毁屍滅跡將屍體抛落海，並相互約定從此唔再提起此事。一年後，4人陸續收到寫住「我知你舊年暑假搞乜鬼」嘅匿名信，跟手有人殺上門尋仇……《舊》其實重啟過，2021年串流平台Amazon Prime曾經推出過同名劇集版，故事大橋一樣只係換咗主演演員。可能換湯唔換藥無咩新意，劇集推出完全無水花而且評價麻麻，埋單仲要被腰斬。
更多電影文章
劫機1971／電影多啦A夢：大雄之地球交響樂／賽馬娘Pretty Derby：新時代之門︳電影LOL 今期睇咩戲
Late Night with the Devil 15萬美元成本大賺80倍 被封年度最勁恐怖片 係《歡樂今宵》x《驅魔人》？︳電影LOL
《死侍與狼人》開畫全球收4.38億美元 打破今年最高開畫票房紀錄︳電影LOL
四小姊弟遇空難流落亞馬遜森林40日奇蹟生還 真人真事將改編成電影︳電影LOL
班頓費沙接拍登陸諾曼第電影Pressure 演艾森豪威爾將軍 有望再爭影帝︳電影LOL
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
