「殭屍仔」張國權結婚8年 難甩「況復生」名字 老婆更愛杜汶澤

「殭屍仔」張國權結婚8年 難甩「況復生」名字 老婆更愛杜汶澤
「殭屍仔」張國權結婚8年 難甩「況復生」名字 老婆更愛杜汶澤

亞視劇集《我和殭屍有個約會》係好多人嘅集體回憶,況天祐(尹天照飾)與馬小玲(萬綺雯飾)呢對拍檔更加深入民心;早前有指劇集將拍成電影《我和馬小玲有個約會》,尹天照早年已講明唔會再拍殭屍片,有傳男女主角將由黃宗澤與吳千語接替,唔少網民都唔滿意呢個選角,仲話安排當年「殭屍仔」況復生去飾演況天佑會更為適合;不過,飾演況復生嘅張國權(Daniel)早已離開娛樂圈,轉行做名店Sales,33歲嘅佢仲已經結婚8年。

張國權當年係亞視御用童星,9歲時拍攝第一輯《我和殭屍有個約會》,拍攝第三輯時已經15歲;另外更有份出演《精武門》、《劍嘯江湖》等劇集及電影,不過張國權就喺15歲淡出娛樂圈。張國權曾經接受《亞視百人》甘國亮訪問時公開原因,表示覺得15、16歲年齡尷尬,加上拍戲機會唔一定想有就有,又想試吓學第二啲嘢所以決定淡出。不過,「況復生」呢個名都仍然跟住張國權,張國權不但於IG個人簡介寫上「況復生」,佢仲表示身邊好多朋友都仲叫佢「復生」,就連當初認識老婆Freby時,朋友都係用「復生」嚟介紹自己。

據悉,張國權老婆Freby與朋友經營手工蠟燭店,仲係一名兼職美妝KOL。二人於2014年喺日本沖繩舉辦婚禮,結婚8年仍恩愛如初,不時拍片分享日常,也曾分別在結婚8周年當日喺社交平台放閃,張國權寫道:「8年嘅時間原來好快就會過,我每日都會同自己講要好好珍惜你,I love you!」;Freby亦發文:「結婚8周年快樂,8th Happy anniversary,每年520都可以公然放閃,人生的確有好多苦難,但都有好多珍貴開心的時候,搵到你一路陪伴,有時候都唔想時間過得太快,想慢慢珍惜有你我的時光。」Freby被網民問到,認識張國權前有無睇過老公「殭屍仔」演出,佢就回答細個嗰陣有睇,但無人估到當時電視機畫面嗰個就係自己10多年後嘅老公;亦笑言細個好鍾意杜汶澤,所以有得揀嘅話,都想揀做劇中嘅「白素貞」,與杜汶澤一對。

張國權
張國權
《我和殭屍有個約會》
《我和殭屍有個約會》
《我和殭屍有個約會》
《我和殭屍有個約會》
張國權
張國權
張國權
張國權
張國權
張國權

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能