「補習天王」重出江湖 睇中「君臨天下」原因

創辦現代教育「補習天王」Ken Sir再次進軍九龍站豪宅重鎮，當教育都可以變成生財工具，低買高賣物業是搵食基本功，唔通而家豪宅價已跌入抵買區？

下載Yahoo財經APP
美股、外匯、加密貨幣免費即時報價，自選投資組合獲取相關新聞提示。

香港樓市再陷瘋狂，不少名人及資深投資者再露手影入市，「補習天王」Ken Sir（吳錦倫）最近重出江湖，以2450萬元購入九龍站「君臨天下」3座高層E單位，實用833方呎兩房連儲物室，實呎29412元。根據資料，於5月份「君臨天下」實用成交呎價為29,523元，所以佢今次以市價入市。

愛捕捉樓市高低浪

佢作為「資深物業投資者」，擁有過不少豪宅，最光輝一役要數，於2005年以6150萬元購入九龍站「凱旋門」一個「大宅門」單位，並2012年以1.25億元售出，帳面激賺6350萬元。

睇番差估署嘅樓價走勢，2005年屬於沙士後樓市低潮，而2012年香港樓價差不多升30%，所以佢完美演繹低買高賣技倆。

君臨天下樓價回軟

今次佢買入「君臨天下」單位最近同類型成交，可能要數2019年5月3座72樓E單位嘅交易，成交價為2688萬元，呎價為32,861萬元。值得留意，差估署樓價指數於同年5月創歷史高位，換言之該業主是摸頂入市。

至今「君臨天下」樓價由高峰跌咗一成，曾經係九龍站發過跡嘅Ken Sir食髓知味，想再撈底，博未來豪宅價再上。

雖然佢重施故技有無成果，而家就未知，但佢係樓市嘅投資非無往而不利，事關佢有損手時候，鴨脷洲「南灣」及上水「天巒」洋房兩單交易，令佢蝕近900萬元。

而家佢再入市唔多唔少反映佢對後市有信心，一係樓價未升完，一係想為財富保值。