【你家山發】85歲「周老闆」金剛賣聲 為餐茶再簽新經理人

他叫金剛。

此金剛不同彼金剛。他不是在公仔箱講半鹹淡廣東話那位搞笑金剛，這位金剛原名叫周朝杰，現年85歲，聽聲肯定認出他，因為他是商台播了半世紀長壽廣播節目《十八樓C座》中的周老闆。

金剛在廣播劇中聲演茶餐廳老闆，訪問當天，就相約他在西環一間茶餐廳，讓金剛跳出直播室來個角色扮演 ，他不但上身大講口頭襌「你黐筋啦」、「你家山發」，還坐鎮收銀櫃枱前，幫手聽電話落外賣訂單。

「o依家好少人叫我金剛，自從做咗《十八樓C座》周老闆，好多人都叫我周老闆，我真名叫周朝杰，更加冇人知。」金剛對茶餐廳是有情意結，「我好鍾意茶餐廳，起碼經濟條件對我嚟講啱晒嘛，我哋入息唔多，嚟茶餐廳食嘢又平又抵，啱晒我哋香港人。」金剛和周老闆已連為一體，廣播劇會諷刺時弊，金剛說：「我代表周老闆角色，我冇立場，其實周街都有周老闆，佢就係簡單一個小人物，茶餐廳老闆多數鹹鹹濕濕，鍾意打牙骹，噴口水，見靚女招呼吓，見啲阿爺阿婆就唔招呼，嗰啲小人物，香港隨處係。」

金剛話當年，21歲時做過巴士售票員，有見工作古板沒前途，轉到港台做藝人，1964年過檔商台，一做便做到現在。金剛越老越起勁，即使過了退休年齡，但他仍幹勁十足，永不言休。金剛去年底簽了新經理人，準備今年有新發展：「我仲想有新嘗試，除咗做廣播劇，仲做出面嘢，我唔需要搵人，人哋叫到我做乜就做乜，拍戲客串乜都得，有人搵咪做，老實講冇話乜嘢期望，我唔知經理人搵我做啲乜，我希望乜都做，如果唔做，做乜簽。」講到薪酬方面，金剛絕不計較，「你認為我值幾多咪畀幾多，o依家唔使我講，有經理人公司，我唔知自己有幾多價值，值幾多錢，經理人話我值幾多就幾多。」金剛活到老、做到老、學到老，他希望主要賣聲，畢竟聲演工作比較輕鬆：「最自在淨係賣聲，如果賣埋身咪拍電影囉，時間長，我最怕要等埋位，不過有錢收最緊要。」

金剛回想1964年跳槽商台，月薪只有500元，以今日生活指數計算，即約月薪6、7千元，他說：「掹掹緊㗎，咁以前一年加啲，我咁多年資歷，無謂講加咗幾多，我o依家唔做，我下個月就冇糧出，咁即係冇得食，我唔係政府工，我哋冇長糧，我哋公積金唔多。o依家要搵食，但我唔食得幾多，當然希望將自己嘅嘢貢獻畀大家，所以我好多謝經理人公司，希望佢做好啲，幫我搵多啲，互相得益。好似當年打工捉襟見肘，我就唔想啦。簽咗經理人同我搵多啲錢，我有人工嗰日，孫仔周日有茶飲，仲整多兩碟炒麵。」

採訪：比華利
場地提供：金記冰室