【同陳瀅係好兄弟】堅稱冇餵食冇上樓冇拍拖 陳家樂話怕怕唔諗愛情

陳家樂被《蘋果》獨家踢爆大前晚同陳瀅喺中環撐枱腳，食餐飯都不停咬耳仔，全程笑得好開心，又餵食魚生，十足蜜運中嘅情侶，飯後陳瀅仲親自揸車同陳家樂返香閨，「雙陳戀」斷正。

今日兩位當事人都分別現身公開活動。陳家樂同湯怡、黃秋生、林嘉欣喺新界出席新片《死因無可疑》開鏡禮，為緋聞親身解畫，陳家樂拉埋前緋聞女友湯怡一齊接受訪問，先問到湯怡係咪有甩難感覺？佢笑言：「唔好咁講，只係覺得有啲好笑。」家樂即狂呻：「我就嚟冇朋友，同我食餐飯嘅朋友都好易被人誤會，朋友send message同我講唔同我食飯。」湯怡即接住講：「係呀！唔使再約㗎喇！」

但餐飯好明顯見到陳家樂餵陳瀅食魚生喎？家樂即否認有餵食：「冇餵，係角度問題，應該係讀者揸機角度問題，其實係冇嘅。大家覺得似啫，我唔覺得似嘅。」至於講到坐陳瀅車一齊返屋企，家樂繼續否認：「唔係去佢屋企，佢屋企好近港鐵站，嗰日我冇揸車，佢就車埋我過海，我去地鐵站。咩站就唔好講。」問到係咪同陳瀅拍拖？佢再否認：「梗係唔係啦！我唔諗呢啲，o依家好驚。」驚陳瀅太主動？家樂話：「唔係，o依家好驚，上個禮拜話我同怡姐，今個禮拜同瀅姐，每位都係我合作緊嘅伙伴。」

家樂同陳瀅正拍攝大台新劇《廉政行動2019》，家樂笑指唔會再有朋友，只好自己一個人食飯。不過家樂都讚陳瀅係一位有義氣嘅女仔，呢方面同衛詩雅好相似。湯怡即刻搶住問：「係咪我冇義氣？」家樂笑言：「唔係，陳瀅好有雷氣，我哋係好朋友關係，好似兄弟情，由兄弟跳去情侶好似唔係咁好。」咁究竟陳瀅同湯怡邊個係家樂杯茶呢？家樂直指冇諗自己有咩擇偶條件，因為工作太忙，唔識得諗呢方面嘅問題。

另外，陳家樂喺新戲中飾演保險從業員，佢話以前做過一年保險經紀，所以導演搵佢做呢個角色，同湯怡有少少親熱戲，但有情侶之間嘅爭執，大家價值觀唔同時有拗撬，亦會有正常情侶嘅親熱鏡頭。而湯怡就演大學生，有大小姐脾氣。