【回顧2021.娛樂】今年十大娛樂大事回顧 TVB人事大變動/MIRROR衝出香港...

·6 分鐘文章
2021年娛樂大事回顧
2021年娛樂大事回顧

2021年即將步入尾聲,今年香港娛樂圈發生咗唔少大事,而家就同大家回顧一下今年香港十大娛樂新聞啦!

MIRROR年
人氣男團MIRROR成軍三年,出道以來人氣一直居高不下,成功掀起香港久違嘅追星熱潮。今年絕對係佢哋嘅大豐收,成員們除咗歌影視工作不斷之外,廣告代言亦無處不在,行到邊都會見到12子嘅踨影,滲透力相當驚人。MIRROR於5月舉行一連6場《MIRROR ONE & ALL LIVE 2021》演唱會,一班鏡粉全力撲飛,兩度加場仍然一票難求。另外,MIRROR成功衝出香港,例如《紐約時報》專題報道探討掀起熱潮嘅原因、Edan及Anson Lo主演嘅港版《大叔的愛》秋季反攻日本、Anson Lo於韓國樂壇大型頒獎禮「Mnet Asia Music Awards」(MAMA )榮獲最佳亞洲新人獎(華語地區)等等、及姜濤獲美國著名娛樂雜誌評選為「2021年國際突破之星」等等。

MIRROR
MIRROR

193 vs. 曾志偉
今年初曾志偉回歸無綫擔任高層,推出多個綜藝節目與ViuTV硬撼。曾志偉喺受訪時指ViuTV收視得4點,題材偏門,認為應該與J2台比較而唔係翡翠台。之後ERROR成員193(郭嘉駿)反擊:「收視點得嗰幾百部電視機,我哋不嬲都唔介意」,又直言無綫係俾「老嘢」睇,及笑言J2節目「40幾歲仲做後生仔傾吓偈嗰個啊嘛」,形成隔空罵戰。其後,193獲網民認同及激讚,兼被封為「娛樂圈清泉」同「三爺」,人氣急升。

193 vs. 曾志偉
193 vs. 曾志偉

無綫惡搞姜濤
男團MIRROR「人氣王」姜濤有幾紅,相信唔使再多講。喺今年3月無綫舉行「超級綜藝隆重登場」記者會,期間鄧智堅喺記者會上惡搞姜濤,改稱自己係「薑蓉」兼跳住舞唱出其名曲《蒙著嘴說愛你》。事件引起大批「姜糖」不滿,紛紛喺網上留言鬧爆表達不滿。大方嘅姜濤事後就話唔介意,唔係好大件事,希望大家可以輕鬆去睇呢件事。

無綫惡搞姜濤
無綫惡搞姜濤

《大叔的愛》成ViuTV最高收視劇集
日本BL神劇《大叔的愛》喺2018年播出時紅遍全亞洲,ViuTV上年購入版權開拍港版《大叔的愛》,並由MIRROR成員Edan(呂爵安)、Anson Lo(盧瀚霆)及黃德斌主演,劇集一出即大受歡迎,除咗貫徹誇張搞笑作風之外,港版亦成功將多個經典場面完美呈現,贏盡口碑兼被網民瘋狂洗版,更成為ViuTV開台以嚟最高收視劇集。

《大叔的愛》成ViuTV歷來收視最高劇集
《大叔的愛》成ViuTV歷來收視最高劇集

楊明不小心駕駛
喺上年8月,楊明於山頂馬己仙峽道失事撞壆,被控「不小心駕駛」、「車窗玻璃透光度不足」、「拒絕提供血液樣本化驗」,而佢承認「不小心駕駛」及「車窗玻璃透光度不足」,而「拒絕提供血液樣本化驗」罪則不成立。案件去到今年11月於東區裁判法院裁決,判楊明即時入獄18日,獲准保釋。

楊明不小心駕駛
楊明不小心駕駛

《梅艷芳》票房大賣
傳記電影《梅艷芳》由王丹妮、劉俊謙及廖子妤等人主演,將梅姐傳奇嘅一生重現喺大家眼前,電影由11月上映至今叫好又叫座,累積票房已突破6,000萬港元,成為今年最賣座港產電影,電影公司為咗答謝市民支持,喺梅姐忌辰(12月30日)請市民免費搭電車。另外,梅姐胞兄梅啟明入稟高等法院指電影公司未得到佢嘅同意就使用有關商標,所以要求電影公司對佢嘅損失作出賠償。

《梅艷芳》
《梅艷芳》

《全民造星IV》掀熱潮
ViuTV選秀真人騷過去三屆都大獲好評,首屆成功打造人氣男團MIRROR及ERROR。今年ViuTV舉辦《全民造星IV》外間反應非常熱烈,花姐同Wing表示收到4千份報名表。以打造最強女團為目標嘅《全民造星IV》喺10月尾首播,隨即掀起熱潮,一班參賽者成為大家熱門討論話題。總決賽亦喺聖誕節(25日)圓滿結束,最終由Marf(邱彥筒)、Gao(沈貞巧)及Day(許軼)奪得冠亞季軍,可直入女團,而其餘女團成員將於下年1月12日公布。另外,總決賽當晚收視創下史上平均新高7.7點,而無綫同時段播放嘅節目收視明顯下滑。

《全民造星IV》(ViuTV Facebook)
《全民造星IV》(ViuTV Facebook)

曾志偉 / C君 / 王祖藍出任無綫高層
今年無綫出現人事大變動,年初搵咗曾志偉同王祖藍回巢做高層分別出任副總經理同首席創意官,進行一連串嘅改革,推出多個綜藝節目及電視劇與ViuTV對撼,曾志偉喺9月獲委任為總經理(節目內容營運)。而一向主意多多嘅C君喺9月開始出任打年輕市場嘅J2台創意總監。

曾志偉
曾志偉

《少年的你》入圍奧斯卡
電影 《少年的你》由曾國祥執導,並搵嚟周冬雨及易烊千璽主演,電影除咗喺金像獎及多個頒獎典禮獲得獎項之外,亦代表香港出戰第93屆奧斯卡「最佳國際影片」,成功殺入最後5強,非常威水。

《少年的你》入圍奧斯卡
《少年的你》入圍奧斯卡

王浩信蔡思貝奪視帝視后 陳自瑤疑似黑面成焦點
《萬千星輝頒獎典禮2020》喺年頭舉行,結果由王浩信及蔡思貝揮低對手,成為出爐視帝視后。蔡思貝憑《踩過界II》趙正妹一角首次登上視后寶座,成為首位無綫90後最佳女主角,不過有唔少網民認為佢未夠班。而王浩信憑《踩過界II》盲俠一角勇奪「馬來西亞最喜愛TVB男主角」及「最佳男主角」,成為雙料視帝。喺講得獎感言時罕有多謝太太陳自瑤(Yoyo),但Yoyo喺鏡頭面前疑似「黑面」及冇作出任何回應,事後引起網民瘋狂討論及洗版。

《萬千星輝頒獎典禮2020》截圖
《萬千星輝頒獎典禮2020》截圖
《萬千星輝頒獎典禮2020》截圖
《萬千星輝頒獎典禮2020》截圖
《萬千星輝頒獎典禮2020》截圖
《萬千星輝頒獎典禮2020》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能