【契女指屋企好似俾人打劫】愛兒遺物被取走 陳百強媽咪：我對唔住阿強

已故巨星陳百強（Danny）離世25年，家人在故鄉台山為他建紀念館，收藏Danny生前的靚衫、獎座、私人物品等；性格憂鬱的他，雖然生前跟父母緣薄，但很錫媽咪，痛失獨生子的陳媽媽，約20年前移居番禺，10年前不幸中風，身體較以前差了，但精神尚算不錯。

近日，《蘋果》收到讀者報料，並提供一條陳媽媽跟自稱契女對話的短片，讀者聲稱「相信幾批歌迷為爭取偶像物件發生問題，而台山展覽館很多陳百強珍藏品已不翼而飛！」從短片的對話中，契女對陳媽媽說：「阿媽，今日我上嚟，發現屋企啲嘢，觀音又唔見埋，成個飾櫃裏面啲嘢又唔見晒，裏面嘅水晶全部冇晒，仲有大嘅相框又唔見晒。」

據契女所指，質疑歌迷L於2月14日到訪陳媽媽家中，拿走了大批Danny的遺物，聲稱將於12月在大會堂搞展覽，契女問陳媽媽有沒有收到歌迷L的借據或租用大會堂搞展覽的文件？陳媽媽說：「冇」契女問陳媽媽：「咁到時佢唔畀返嚟，咁點辦？你唔驚㗎？」陳媽媽說：「驚㗎，我而家惟有日日追佢，打電話畀佢，頭先響過，但又收咗線，我惟有不停打電話，希望佢攞番啲嘢上嚟。」

陳媽媽強調：「我由頭到尾都冇話過願意畀佢，亦唔係賣畀佢，因為佢以前借過一次開展覽，上次展覽得好好，之後佢攞番晒嚟畀我，所以佢講我又借畀佢，就係咁樣。」接着契女叫陳媽媽對着鏡頭，向歌迷L追回Danny遺物：「唔該你攞番晒啲嘢畀我，因為咁樣做，我好對唔住阿強，好對唔住fans，你盡快攞番嚟畀我，到其時我再借過畀你用啦。」契女再問：「佢真係畀咗幾多錢你咁大把？」陳媽媽說：「畀乜啫，畀過100蚊利是我之嘛，我冇收過乜嘢錢，佢冇話借，只係話上嚟同我拜年，我知道呢樣嘢係我大意。」

而契女就指會將事件通知Danny同父異母的兄姐，她說：「屋企好似俾人洗劫一空，飾櫃啲嘢冇晒，相框冇晒，夠膽死連你（陳媽媽）房裏面牆上面掛住啲嘢都拆落嚟，所以我好氣憤，好似屋企俾人打劫一樣，好似有賊入屋。」

日前有人將這條短片上載到紀念Danny的社交網，fans紛紛留言：「點解要咁樣對老人家！丹尼會好傷心！」、「有冇咁過份呀」；另亦有fans質疑：「陳媽媽幾時有個契女？」《蘋果》向Danny的同父異母大哥陳百靈了解事件，他以短訊回覆：「呢件事我略有所聞，唔係好清楚，亦唔想知。」