【對話流出】張致恒哭腔求債主通融 表示因無人湊仔已離職 與雯雯口供不一

張致恒（Steven）與老婆區燕雯（雯雯）結婚四年抱四，不過雯雯經常於社交平台數臭老公，又屢次嗌離婚，被封「離婚界KOL」，兩公婆更不時大呻家中財務問題。張致恒11月坦言自己現時任職性商品店售貨員，薪金較高夠養家；不過，早前張致恒及雯雯疑欠租被趕走，富二代 Sean Lam亦爆料指張致恒已經無做性商品店，仲公開佢向債主賴皮並指自己還唔到咁多錢嘅錄音。

張致恒於錄音中稱呼債主為「大哥」，用哭腔向對方表示諗緊辦法還錢：「大哥我都同你講過，就算我係還畀你，我都只係還到一二千，我無咁多錢可以還畀你。」又指自己因為無人幫手湊仔，已經無喺嗰到返工：「我而家仲諗緊方法去搵錢，你逼我都冇用…你咪去…唉我唔知啊，我嗰個老細喺英國住，同呢邊倒轉有時差，所以佢夜晚先出糧，我而家都等緊佢過錢畀我，一有我就即刻轉畀你好無，新一年大家好黎好去好無啊？」Sean就再爆料指張致恒講大話，加上雯雯早前大爆老公瞓覺唔湊仔，令人感覺佢哋講大話又無夾定口供。

張致恒12月貼出IG Storty表示自己搭港鐵時攰得濟企喺度瞓着左，電話跌落地碎曬，再加上屋企經濟壓力令佢就嚟頂唔住，因交唔到租搬過好多次。雯雯亦於冬至當晚出PO，疑似因欠租被臨時迫遷無家可歸：「咁凍可以同佢地去邊？原來去到絕路嘅時候，真係會無人幫。」直至聖誕節，雯雯貼出與囝囝到嘉年華嘅照片：「謝謝邀請，多謝有心人，問題解決，可以同小朋友過聖誕。」，疑似有人已替佢解決租金問題；同時分享囝囝天寶玩滑梯嘅短片，影片中，張致恒疑似話囝囝唔分享食物而笑指佢係「自私仔」。雯雯踏入2024年又再連發三個限時動態怒轟張致恒唔湊仔：「新一年我真係唔想再講，但係點解呢個世界可以有啲咁樣嘅人？個仔發高燒不停喊，我喺度氹，出面兩個仔肚餓夠膽死話冇錢，所以冇處理。大佬，你唔識煮嘢㗎？為咗瞓覺自己唔去讀個平安卡都算，個仔一開學就唔帶佢返學其實你究竟想點樣？！」網民就對雯雯指張致恒唔湊仔，以及張致恒解釋自己因無人幫手湊仔而唔返工嘅言論無法理解。

雯雯又表示如果離婚只可以照顧到兩個小朋友：「一句離婚好簡單，咁係咪我淨係要兩個小朋友？咁另外兩個小朋友又點呢？如果俾佢死得啦！我能力只可以照顧到兩個，咁請問另外兩個又可以點樣？真係送去啲機構？個個都話我成日淨係識嗌離婚，但係做唔到，咁你又可唔可以教吓我小朋友點呢？送去保良局？！」 網民就直指幸好張致恒已結紮；不過，Sean Lam又指：「你哋唔係信佢真係結紮咗嘛？」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！